عالمی عدالت انصاف کے جج لبنان کے نئے وزیر اعظم نامُزد

بیروت: لبنانی صدر نے عالمی عدالت انصاف (آئی سی جے) کے جج نواف سلام کو لبنان کا نیا وزیر اعظم نامزد کر دیا۔

غیر ملکی میڈیا رپورٹس کے مطابق لبنانی صدر جوزف عون نے پیر کو عالمی عدالت انصاف (آئی سی جے) کے جج نواف سلام کو نئی حکومت بنانے کے لیے نامزد کیا ہے

نواف سلام نے 128 نشستوں پر مشتمل پارلیمنٹ میں 84 ارکان کی حمایت حاصل کی جبکہ 9 اراکین پارلیمنٹ نے نگران وزیر اعظم نجیب میقاتی کے کابینہ بنانے کے حق میں ووٹ دیا۔35نے دونوں کی حمایت کرنے سے انکار کیا۔

مزید پڑھیں:لبنان میں آرمی چیف ملک کے نئے صدر منتخب

مزید پڑھیں:لبنان بارڈر؛ جنگ بندی خاتمے سے قبل اسرائیلی فوج دُم دبا کے بھاگ کھڑی ہوئی

نواف سلام اس وقت ہیگ میں عالمی عدالت انصاف کے سربراہ کے طور پر خدمات انجام دے رہے ہیں۔ رپورٹ کے مطابق نواف سلام لبنان سے باہر ہیں وہ منگل کو وطن واپس پہنچ جائیں گے۔

واضح رہے کہ لبنان میں گزشتہ 2 سال سے نگران حکومت قائم ہے، نئی حکومت بنانے کے لیے سلام کی نامزدگی 2سالہ سیاسی خلا کے بعد سامنے آئی ہے، جس دوران لبنان نے سیاسی تقسیم اور بگڑتی ہوئی اقتصادی صورتحال کا سامنا کیا۔

گزشتہ ہفتے لبنان کی پارلیمنٹ نے آرمی چیف جنرل جوزف عون کو صدر منتخب کیا تھا۔

دوسری جانب لبنان کے نئے وزیراعظم نواف سلام کی تقرری پر فرانسیسی صدر ایمانوئل میکرون نے خیر مقدم کرتے ہوئے کہا کہ تبدیلی کی امید بڑھ رہی ہے، امید ہے نواف سلام لبنان میں عوامی حکومت بنانےمیں کامیاب ہوں گے۔