اقوام متحدہ کے دفتر پر اسرائیل کا حملہ، غیر ملکی اہلکار ہلاک

غزہ: دیر البلح میں اقوام متحدہ کے ہیڈکوارٹر پر اسرائیلی حملے میں اقوام متحدہ کا ایک غیر ملکی اہلکار ہلاک اور 5 دیگر شدید زخمی ہوگئے۔

عرب میڈیا کے مطابق غزہ کی وزارت صحت کی جانب سے جاری بیان میں کہا گیا ہے اسرائیلی فورسز نے اقوام متحدہ کے دیرالبلاح میں موجود آفس پر حملہ کیا جس میں اسپتال لے جاتے ہوئے ایک اہل کار ہلاک اور پانچ شدید زخمی ہوگئے۔

دوسری جانب اسرائیلی فوج نے دیر البلح میں اقوام متحدہ کی کسی بھی عمارت پر حملے کے الزامات کو مسترد کرتے ہوئے اپنے بیان میں کہا کہ میڈیا ادارے غیر مصدقہ رپورٹس پر ذمے داری کا مظاہرہ کریں.

عرب میڈیا اور غیر ملکی خبررساں ایجنسی کی جانب سے فراہم کی گئی تصاویر اور ویڈیو میں زخمی غیر ملکیوں کو اقوام متحدہ کی گاڑی اور ایمبولینس میں اسپتال لائے جانے کے مناظر دیکھے جاسکتے ہیں۔

غزہ کے سرکاری میڈیا آفس نے اس حملے کی شدید مذمت کرتے ہوئے اسے فلسطینی عوام کی مدد سے روکنے کے لیے اقوام متحدہ اور دیگر امدادی اداروں کو نشانہ بنانے کی ایک ’منظم پالیسی‘ قرار دیا ہے۔

بیان میں مزید کہا گیا کہ ’ہم اقوام متحدہ سے مطالبہ کرتے ہیں کہ وہ اس جرم پر واضح اور سخت مؤقف اختیار کرے اور فوری اقدامات کرتے ہوئے اسرائیل کو جوابدہ ٹھہرائے‘۔

جنگ بندی معاہدے کے خلاف ورزی کرتے ہوئے غزہ میں گزشتہ روز سے جاری اسرائیلی حملوں میں شہید ہونے والوں کی تعداد 430 سے تجاوز کرچکی ہے، جبکہ زخمیوں کی تعداد 650 سے زائد ہے۔

غزہ کی وزارت صحت کے مطابق 7 اکتوبر 2023 سے اب تک اسرائیلی جارحیت کے نتیجے میں غزہ میں 49 ہزار 547 افراد شہید اور ایک لاکھ 12 ہزار 547 افراد زخمی ہوچکے ہیں۔