"پاکستان جب بھارت پر حملہ کرے گا تو دُنیا دیکھے گی”: ترجمان پاک فوج

ڈی جی آئی ایس پی آر لیفٹیننٹ جنرل احمد شریف چوہدری نے کہا کہ گرائے جانے والے بھارتی ڈرونز کا فارنزک معائنہ کیا جا رہا ہے۔

دفتر خارجہ آفس میں نائب وزیر اعظم اسحاق ڈار کے ہمراہ پریس بریفنگ میں ڈی جی آئی ایس پی آر نے کہا کہ بھارت کی طرف سے کسی بھی قسم کے حملے کی مکمل نگرانی کی جارہی ہے۔

ترجمان پاک فوج کا کہنا ہے کہ ٹیکنالوجی کی ترقی کے سبب ہر چیز کی ڈیجیٹل مانیٹرنگ کی جارہی ہے، امرتسر میں بھارتی تنصیبات کو بھارتی میزائلوں نے ہی نشانہ بنایا۔

ڈرامے کیلئے کھیتوں میں رکھے پرزوں کے ساتھ کچھ آگ ہی لگا دیتے، بھارت کی طرف سے پاکستان آنے والی کسی بھی چیز پر مکمل نظر رکھے ہوئے ہیں۔

ترجمان کا کہنا تھا کہ پاکستان اپنی مرضی سے حملہ کرے گا، بھارتی میڈیا کو بتانے کی ضرورت نہیں، پاکستان حملہ کرے گا تو سب کو نظرآئے گا، اس کی گونج سنائی دے گی۔

ڈی جی آئی ایس پی آر کا کہنا تھا کہ بھارت کا پاکستان پر ڈرون حملوں کا الزام جھوٹ پر مبنی ہے، ترجمان پاک فوج کا مزید کہنا تھا کہ بھارت ڈراموں کے ذریعے مذموم مقاصد حاصل کرنا چاہتا ہے، بھارت کا 15مقامات پر حملے کا الزام مضحکہ خیز ہے۔