ترجمان پاک فوج کا سابق ڈی جی آئی ایس آئی کے حوالے سے بڑا انکشاف

ترجمان پاک فوج لیفٹیننٹ جنرل احمد شریف چودھری نے سابق ڈی جی آئی ایس آئی کے ٹرائل اور کورٹ مارشل کے حوالے سے انکشاف کردیا۔

پشاور میں اہم واقعات و مسائل پر پریس کانفرنس کرتے ہوئے ڈی جی آئی ایس پی آرنے بتایا سابق ڈی جی آئی ایس آئی کا ٹرائل اور کورٹ مارشل ہورہا ہے، فوج کے اندر خود احتسابی کا ایک نظام ہے اس کو جب فعال کیا جاتا ہے تو دفاع کیلئے بھی پورا موقع دیاجاتا ہے۔

ان کا کہنا تھا کہ ہمیں کسی تاخیر پر کوئی پریشانی نہیں ہے۔ پاک فوج میں خود احتسابی کا عمل صرف الزامات پر نہیں ہوتا بلکہ حقائق پر ہوتا ہے۔

ترجمان پاک فوج کا کہنا تھا کہ فوج کا ریاست کے ساتھ سرکاری تعلق ہوتا ہے ذاتی یا سیاسی نہیں، اس تعلق کو اگر کوئی ذاتی بناتا ہے تو یہ غلط ہے، فیصلے ریاست کرتی ہے ہم کسی کی سیاست کو لے کر نہیں چلتے۔

انھوں نے بتایا کہ فیلڈ جنرل کورٹ مارشل کی ایک وجہ یہ بھی ہے کہ آپ تعلق کو ذاتی اور سیاسی بنادیں توجوابدہی ہوگی، ہمیں آپ اپنی سیاست میں نہ لائیں، آپ کی سیاست آپ کو پیاری ہماری لیے تمام سیاسی جماعتیں قابل احترام ہیں۔

ترجمان پاک فوج کا کہنا تھاکہ 9 مئی کے حوالے سے ہمارا مؤقف واضح ہے، یہ افواج پاکستان کا نہیں قوم کا مقدمہ ہے۔