ایٹمی دھماکوں کے بعد دوسرا مشکل ترین دور تھا، بحران سے نکل آئے ہیں : اسحاق ڈار

وزیر خزانہ کا کہنا ہے کہ مشکل وقت میں اقتدار لیکر ووٹ کی بجائے ملک بچانے کو ترجیح دی، بہترین حکمت عملی سے بحران سے نکل آئے ہیں۔

وزیر خزانہ اسحاق ڈار نے مدینہ منورہ میں تقریب سے خطاب میں کہا کہ پاکستان نے آئی ایم ایف کی تمام شرائط پوری کر دیں۔ 6 ماہ کی قلیل مدت میں 11 ارب ڈالر کی ادائیگی بروقت کی ہے۔ ملک کو ڈیفالٹ کروانے والے کو شرمندگی ہوئی ہے۔

یہ بھی پڑھیں : 2018 کی تبدیلی نہ آتی، تو پاکستان کا شمار تیز ترین ترقی کردہ معیشت میں ہوتا : احسن اقبال

انہوں نے کہا کہ 1998 ایٹمی دھماکوں کے بعد اب دوسرا مشکل ترین دور تھا۔ پی ٹی آئی نے معاشی تباہی کی اور ملک کو ڈیفالٹ کے دہانے پر پہنچایا، جس کا برملا اظہار پی ٹی آئی سینیئر قیادت اور مشیر خزانہ کرچکے ہیں۔

ان کا کہنا تھا کہ مشکل وقت میں اقتدار لیکر ووٹ کی بجائے ملک بچانے کو ترجیح دی۔ بہترین حکمت عملی سے بحران سے نکل آئے ہیں۔ 2013 میں بھی نواز شریف کی قیادت میں ملک کو ترقی کے سفر پر ڈال دیا تھا۔ 4 سال کے قلیل عرصے میں مہنگائی 2 فیصد کی شرح پر لے آئے تھے۔