سمندری طوفان موچا کے میانمار سے ٹکرانے کے بعد سیلاب، تین ہلاک

طوفان موچا 155 میل فی گھنٹہ کی رفتار سے چلنے والی ہواؤں کے ساتھ خطے میں اب تک کا سب سے طاقتور طوفان ہے، جس کے باعث متاثرہ علاقے میں مواصلاتی نظام تباہ ہوگیا۔

طوفان موچا میانمار میں ساحل سے ٹکرا گیا ہے، جس کے بعد امدادی کارکنوں کو نقصان کی حد کا اندازہ لگانے کے لئے جدوجہد کرنا پڑ رہی ہے کیونکہ طوفان نے مواصلات میں بڑی رکاوٹ پیدا کردی ہے۔

اس خطے میں اب تک کا سب سے زیادہ طاقتور طوفان بنگلہ دیش کی سرحد کے جنوب میں شمال مغربی رخائن ریاست کے ساحل سے گزرا، جہاں درخت اکھڑ گئے، کھمبے اور تاریں گر گئیں، نشیبی علاقے میں سڑکیں ڈوب گئیں۔

250 کلومیٹر فی گھنٹہ کی رفتار سے چلنے والی ہواؤں کے ساتھ، موچا میانمار کے سیٹوے اور بنگلہ دیش کے کاکس بازار کے درمیان ٹکرا گیا ہے، یہ تقریباً 10 لاکھ مسلمان روہنگیا پناہ گزینوں کا مرکز ہے، جنہیں 2017 کے فوجی کریک ڈاؤن میں میانمار سے زبردستی نکالا گیا تھا۔

یہ بھی پڑھیں : میانمار میں فوج کے فضائی حملے میں ہلاکتوں کی تعداد 133 تک پہنچ گئی

کاکس بازار میں روہنگیا پناہ گزینوں کا مرکزی کیمپ بظاہر طوفان کی بدترین صورتحال سے بچ گیا تھا، لیکن کہا جا رہا ہے کہ حقیقی نقصان کی تصدیق کرنے میں کئی دن یا ہفتے لگ سکتے ہیں۔ کیونکہ بہت سے چھوٹے بکھرے ہوئے ساحلی جزیرے ہیں جہاں ماہی گیروں کے پاس بات چیت کرنے کے ذرائع نہیں ہیں اور وہ انتباہات پر دھیان نہیں دیتے ہیں۔

میانمار میں، ابتدائی اطلاعات کے مطابق ریاست رخائن کے دارالحکومت سیٹوے کو بری طرح نقصان پہنچا ہے۔ میانمار کے ملٹری انفارمیشن آفس نے کہا کہ طوفان نے سیٹوے، کیاوکپیو اور گوا ٹاؤن شپ میں نقصان پہنچایا ہے۔ جبکہسب سے بڑے شہر ینگون کے جنوب مغرب میں تقریباً 425 کلومیٹر دور کوکو جزائر پر کھیلوں کی عمارتوں کی چھتیں بھی اڑا دیں۔

ایک کمیونیکیشن ٹاور کے گرنے سے انٹرنیٹ اور فون سروسز بھی منقطع ہو گئیں، جس سے نقصان کی تشخیص کی کوششیں پیچیدہ ہو گئیں۔