سالِ نو کا جشن: ملازمین کو سونے کے زیورات ملیں گے، مگر کیسے؟

سالِ نو کے موقع پر دبئی اور متحدہ عرب امارات کے حکام نے ملک کی ترقی میں اہم کردار ادا کرنے والے کارکنوں کی خدمات کو خراج تحسین پیش کرنے کے لئے خصوصی مراعات اور انعامات کا اعلان کیا ہے۔

سرکاری حکام کے مطابق یہ اقدام "ہیپی ورکرز، پھلتا پھولتا کاروبار” کے موضوع سے مطابقت رکھتا ہے، جس کی قیادت وزارت انسانی وسائل نے دیگر سرکاری محکموں کے تعاون سے کی ہے۔

مزدوروں کی اہمیت کو اجاگر کرتے ہوئے دبئی کے حکام نے کہا کہ ان کا ملک مزدوروں کی محنت پر تعمیر کیا گیا ہے اور مزدور ترقی میں حکومت کے شراکت دار ہیں۔

تقریبات کے ایک حصے کے طور پر ، حکام نے اعلان کیا کہ منتخب کارکنوں کے لئے دو بالکل نئی کاروں کے ساتھ ساتھ کارکنوں کے اہل خانہ کو سونے کے زیورات تحفے میں دیئے جائیں گے۔

کارکنوں میں 30 مفت ہوائی ٹکٹ تقسیم کیے جائیں گے اور مجموعی طور پر 5 لاکھ درہم مالیت کے دیگر انعامات بھی دیئے جائیں گے۔

نئے سال کی تقریبات کے دوران کارکنوں کو دو دن تک تیز رفتار انٹرنیٹ تک مفت رسائی حاصل ہوگی۔

مزدوروں کے لئے وقف تہوار کی تقریبات الکوز ، محسنہ اور جبل علی جیسے علاقوں میں منعقد کی جائیں گی ، جہاں مزدور سرگرمیوں میں حصہ لیکر انعامات کے لئے مقابلہ کرسکتے ہیں۔