ڈرائیونگ لائسنس بنوانے والوں کے لئے بڑی خبر آگئی

پنجاب میں آن لائن ڈرائیونگ لائسنس سسٹم اچانک بند ہونے سے شہریوں کو شدید مشکل کا سامنا کرنا پڑا۔ سسٹم کریش ہونے کے باعث لوگ نہ نئے لائسنس کے لیے درخواست دے سکے اور نہ ہی اپنے لائسنس کی تجدید کر سکے۔

ذرائع کے مطابق ڈی ایل آئی ایم ایس پورٹل کچھ گھنٹے مکمل طور پر غیر فعال رہا۔ صارفین کو اس دوران کوئی واضح وجہ نہیں بتائی گئی کہ خرابی کیوں پیش آئی۔ سسٹم بند ہونے سے نہ صرف نئے لائسنس کی درخواستیں رک گئیں بلکہ ای لائسنس ڈاؤن لوڈ اور اپلیکیشن ٹریکنگ جیسے تمام عمل بھی متاثر ہوئے۔

اس صورتحال کی وجہ سے خاص طور پر وہ شہری پریشان نظر آئے جنہیں فوری طور پر لائسنس درکار تھا یا جن کا لائسنس جلد ختم ہونے والا تھا۔ نئے ڈرائیورز بھی سسٹم نہ چلنے پر امتحانی تیاری کے لیے درخواستیں جمع نہ کر پائے۔

ڈی ایل آئی ایم ایس کو حکومت کی جانب سے ایک جدید، شفاف اور تیز رفتار نظام کے طور پر متعارف کرایا گیا تھا۔ اس کا مقصد دفتر کے چکر ختم کرنا، لائنوں میں کمی لانا اور عوام کو گھر بیٹھے سہولت فراہم کرنا تھا۔ تاہم سسٹم کی اچانک خرابی نے شہریوں کے اعتماد کو متاثر کیا۔

کچھ گھنٹوں بعد سسٹم دوبارہ چل پڑا اور صارفین نے تصدیق کی کہ وہ اب پورٹل تک رسائی حاصل کر پا رہے ہیں۔