اڈیالہ جیل کے نواحی علاقے ریڈ زون قرار، سیکیورٹی مزید سخت

راولپنڈی: اڈیالہ جیل کی حفاظت کو بڑھانے کے لیے اس کے نواحی علاقے کو فوری طور پر ریڈ زون قرار دیا گیا ہے۔

ذرائع کے مطابق آج ریڈ زون کی حدود کا حتمی تعین کیا جائے گا، اور اس کے اندر و داخلی راستوں پر قانون نافذ کرنے والے اداروں کے اہلکار بھاری نفری کے ساتھ تعینات ہوں گے۔

ذرائع نے بتایا کہ اڈیالہ جیل میں موجود قیدیوں کی تعداد تقریباً ساڑھے 7 ہزار سے زائد ہے، اور اس میں تحریک انصاف کے بانی عمران خان بھی شامل ہیں۔ ان کی سلامتی کو خصوصی توجہ دی جا رہی ہے اور اضافی حفاظتی انتظامات کیے جا رہے ہیں۔

واضح رہے کہ گزشتہ روز وفاقی وزیر قانون اعظم نذیر تارڑ اور وزیر اطلاعات عطا تارڑ نے پریس کانفرنس میں کہا تھا کہ قیدیوں کی حفاظت اور جیل کے اندر و باہر امن و امان کو یقینی بنانے کے لیے تمام ممکنہ اقدامات کیے جائیں گے۔

اس اقدام کا مقصد جیل کے اطراف میں ممکنہ سیکیورٹی خطرات کو کم کرنا اور قیدیوں و عملے کی حفاظت کو مضبوط بنانا بتایا گیا ہے۔