خواجہ آصف کا گٹر کے ڈھکن چرانے والوں کو گولی مارنے کا مطالبہ

وفاقی وزیر دفاع خواجہ آصف نے شہر میں مین ہول کے ڈھکن چوری کرنے والے افراد کے خلاف سخت ایکشن لینے کا مطالبہ کر دیا ہے۔

سوشل میڈیا پلیٹ فارم ایکس پر جاری اپنے بیان میں وزیر دفاع نے کہا کہ اگر گٹر کے ڈھکن چوری کرنے والوں کی ویڈیوز موجود ہیں تو انہیں فوراً موقع واردات پر لا کر سخت سزا دی جائے۔

انہوں نے کہا کہ یہ لوگ معصوم بچوں کے لیے خطرہ ہیں اور اگر ویڈیو سامنے آنے کے باوجود کوئی کارروائی نہیں کی گئی تو سسٹم بھی بچوں کے قتل کا سہولت کار بن جائے گا۔

یہ بیان کراچی کے نیپا چورنگی کے قریب پیش آنے والے افسوسناک واقعے کے تناظر میں آیا، جہاں تین سالہ بچہ کھلے مین ہول میں گر گیا تھا اور اس کی لاش تقریباً 15 گھنٹے بعد نکالی جا سکی۔

خواجہ آصف کا کہنا ہے کہ ایسے اقدامات بچوں کی جان کو لاحق خطرے کے پیش نظر برداشت نہیں کیے جا سکتے اور قانون نافذ کرنے والے اداروں کو فوری کارروائی کرنی چاہیے۔