دوران سروس وفات پانے والے سرکاری ملازمین کے ورثا کیلئے حکومت کا بڑا اعلان

وفاقی حکومت نے سرکاری ملازمین کے اہل خانہ کے لیے اہم فیصلہ جاری کر دیا ہے۔

 دورانِ سروس وفات پانے والے ملازمین کے ورثاء کو ملنے والی اسپیشل فیملی پنشن میں نئی سہولت شامل کر دی گئی ہے۔ اب اہل خاندان کو 25 فیصد کمیوٹڈ پنشن بھی واپس مل سکے گی، جو پہلے یکمشت رقم کی صورت میں ادا ہوتی تھی۔

فنانس ڈویژن کے نئے آفس میمورنڈم کے مطابق پہلا حقدار یعنی بیوہ یا قریبی عزیز، مقررہ مدت پوری کرنے کے بعد مکمل 25 فیصد پنشن کی بحالی کا حق رکھے گا۔ اس کا مطلب ہے کہ جتنے سال کے لیے کمیوٹیشن دی گئی تھی، اس مدت کے پورا ہونے پر یہ حصہ پنشن میں دوبارہ شامل ہو جائے گا۔

دستاویز میں واضح کیا گیا ہے کہ اگر پہلا حقدار نااہل ہو جائے یا اس کا حق ختم ہو جائے، تو بعد میں آنے والے دیگر اہل ورثاء کو 50 فیصد کمیوٹڈ پنشن بحال کر کے دی جائے گی۔ اس سے ان خاندانوں کو بڑا مالی ریلیف ملے گا جو سرکاری ملازم کی وفات کے بعد مشکلات کا سامنا کرتے ہیں۔