موجیں ہی موجیں؛ دسمبر میں ایک ساتھ 4 چھٹیاں

ملک بھر کے شہری اس ماہ کے آخر میں مسلسل چار دن کی چھٹیاں منانے کا موقع حاصل کر سکیں گے۔ دسمبر کے آخری ہفتے میں دو قومی تعطیلات اور دو ہفتہ وار چھٹیوں کا امتزاج ایک طویل بریک بنا دے گا۔

25 دسمبر جمعرات کو قائداعظم محمد علی جناح کا یومِ پیدائش منایا جائے گا۔ اسی دن کرسمس بھی منائی جاتی ہے۔ اس موقع پر پورے ملک میں عام تعطیل ہوگی۔ تمام سرکاری اور نجی ادارے بند رہیں گے۔

اس کے اگلے دن یعنی 26 دسمبر جمعہ کو مسیحی برادری کے لئے ایک اضافی تعطیل بھی مقرر ہے۔ یہ چھٹی ان کی مذہبی سرگرمیوں کو مدنظر رکھتے ہوئے دی جاتی ہے۔

جمعہ کے بعد ہفتہ اور اتوار کی معمول کی چھٹیاں بھی آ جائیں گی۔ یوں لوگ ایک ساتھ چار دن گھر پر گزار سکیں گے۔

وفاقی حکومت پہلے ہی 2025 کا تعطیلاتی کیلنڈر جاری کر چکی ہے۔ اسی شیڈول کے مطابق 25 اور 26 دسمبر کی چھٹیاں بھی پہلے سے طے تھیں۔