کراچی میں 15 دسمبر سے سردی کی شدت میں اضافہ متوقع

کراچی: محکمہ موسمیات نے شہر میں آئندہ چند روز میں موسم مزید سرد ہونے کی پیشگوئی کی ہے۔

محکمہ موسمیات کے مطابق 15 دسمبر سے سردی کی شدت میں نمایاں اضافہ متوقع ہے، جبکہ آج کا دن خشک اور رات قدرے ٹھنڈی رہنے کا امکان ظاہر کیا گیا ہے۔

محکمہ موسمیات کا کہنا ہے کہ آج کراچی کا زیادہ سے زیادہ درجہ حرارت تقریباً 31 ڈگری سینٹی گریڈ تک پہنچ سکتا ہے۔ شہر میں شمال مشرقی ہوائیں 9 کلومیٹر فی گھنٹہ کی رفتار سے چل رہی ہیں، جس کے باعث موسم میں خنکی برقرار رہے گی۔

محکمہ موسمیات نے بتایا کہ ہوا میں نمی کا تناسب 93 فیصد ریکارڈ کیا گیا ہے۔ زیادہ نمی اور کم ہوا کے باعث شہر میں صبح کے اوقات میں ہلکی دھند بھی چھائی رہی ، جس سے فضائی حدِ نگاہ معمول سے کم رہی۔