بارش اور برفباری؟ محکمہ موسمیات نے بڑی پیشگوئی کردی

محکمہ موسمیات نے ملک کے مختلف حصوں کے لیے موسم کی تازہ صورتحال جاری کر دی ہے۔

 محکمہ موسمیات کے مطابق اسلام آباد سمیت کئی شہروں میں موسم سرد رہے گا۔ آسمان جزوی طور پر ابر آلود رہنے کا امکان ہے۔ بعض علاقوں میں بارش اور پہاڑوں پر برفباری کی پیشگوئی بھی کی گئی ہے۔

مری، گلیات اور قریبی علاقوں میں سردی کی شدت برقرار رہے گی۔ ان علاقوں میں درجہ حرارت مزید کم ہو سکتا ہے۔ شہریوں کو احتیاطی تدابیر اختیار کرنے کی ہدایت کی گئی ہے۔

دوسری جانب پنجاب کے کئی شہروں میں اسموگ کا خدشہ ظاہر کیا گیا ہے۔ لاہور، سیالکوٹ، نارووال، شیخوپورہ، گوجرانوالہ اور گجرات میں فضائی آلودگی بڑھنے کا امکان ہے۔ ماہرین کے مطابق اسموگ سے شہریوں کو سانس اور آنکھوں کی تکلیف ہو سکتی ہے۔

محکمہ موسمیات کے مطابق کئی میدانی علاقوں میں دھند چھائے رہنے کا امکان ہے۔ جہلم، فیصل آباد، جھنگ، ٹوبہ ٹیک سنگھ، بہاولنگر، اوکاڑہ، ساہیوال، ملتان، خانیوال، خانپور، کوٹ ادو اور بہاولپور میں صبح اور رات کے اوقات میں دھند متوقع ہے۔ اسی طرح سندھ کے شہر سکھر، روہڑی، شکارپور، کشمور اور لاڑکانہ بھی دھند کی لپیٹ میں آ سکتے ہیں۔

خیبر پختونخوا کے بعض علاقوں میں بھی دھند کا امکان ظاہر کیا گیا ہے۔ پشاور، صوابی، مردان، چارسدہ، نوشہرہ اور ڈیرہ اسماعیل خان میں حدِ نگاہ متاثر ہو سکتی ہے۔ شہریوں کو غیر ضروری سفر سے گریز کا مشورہ دیا گیا ہے۔

بالائی علاقوں میں موسم مزید سرد ہونے کا امکان ہے۔ چترال، دیر، کوہستان اور گلگت بلتستان کے چند مقامات پر بارش جبکہ پہاڑوں پر برفباری متوقع ہے۔ آزاد کشمیر میں بھی موسم سرد رہے گا اور مطلع جزوی ابر آلود رہنے کی پیشگوئی کی گئی ہے۔