ڈرائیونگ لائسنس بنوانے والوں کیلئے اہم خبر آگئی

پنجاب میں ڈرائیونگ لائسنس حاصل کرنے یا تجدید کروانے والے شہریوں کے لیے ڈی ایل آئی ایم ایس نے نئے آفیشل فیس چارٹ کا اعلان کر دیا ہے۔

نئے نظام کے تحت ہر قسم کے لائسنس کے لیے فیس یکساں اور واضح مقرر کی گئی ہے تاکہ شہریوں کو کسی قسم کی الجھن یا غیر قانونی اضافی فیس کا سامنا نہ کرنا پڑے۔

موٹر سائیکل کے لیے پہلی بار لائسنس حاصل کرنے کی فیس 400 روپے مقرر کی گئی ہے، جبکہ تجدید کی صورت میں صرف 200 روپے ادا کرنے ہوں گے۔

 کار یا جیپ کے لائسنس کے خواہشمند افراد کے لیے فیس 1,350 روپے رکھی گئی ہے اور تجدید پر 675 روپے ادا کرنے ہوں گے۔ لائٹ ٹرانسپورٹ ویکل یا تجارتی گاڑیوں کے لائسنس کی فیس قدرے زیادہ رکھی گئی ہے، پہلی بار لائسنس کے لیے 2,480 روپے اور تجدید پر 1,240 روپے ادا کرنا ہوں گے۔

ڈی ایل آئی ایم ایس نے شہریوں کو خبردار کیا ہے کہ وہ کسی غیر سرکاری ایجنٹ یا جعلی فیس چارٹ پر بھروسہ نہ کریں۔ اس سے نہ صرف اضافی فیس لگ سکتی ہے بلکہ عمل میں تاخیر بھی پیدا ہوتی ہے۔

 عہدیداروں کا کہنا ہے کہ سرکاری فیس کے ذریعے لائسنس حاصل کرنے سے شہریوں کا وقت، پیسہ اور محنت بچتی ہے، اور لائسنس کا عمل شفاف اور آسان ہو جاتا ہے۔ شہریوں کو ہدایت کی گئی ہے کہ صرف سرکاری چینلز کے ذریعے فیس کی تصدیق کریں اور لائسنس کے لیے درخواست دیں۔