عالمی نظام میں تیز تبدیلی، فیلڈ مارشل عاصم منیر کی حکمت عملی کو پہلا انعام

عالمی نظام میں تیز رفتار تبدیلی کے تناظر میں فیلڈ مارشل عاصم منیر بدلتے عالمی نظام میں سب سے مؤثر اسٹریٹجک رہنما بن کر ابھرے ہیں۔

برطانوی جریدے نے فیلڈ مارشل عاصم منیر کو کثیر الجہتی خارجہ پالیسی کا ماہر قرار دیا ہے، فنانشل ٹائمز کے مطابق بدلتی عالمی سیاست نے مڈل پاورز کے لیے ایک نیا مگر مشکل دور کھول دیا ہے، جبکہ یہ پیش رفت مڈل پاورز کے لیے خاصی پیچیدہ ثابت ہو رہی ہے۔ اسی تناظر میں فیلڈ مارشل عاصم منیر کو درمیانی طاقتوں کے کامیاب ملٹی الائنرز میں شامل کیا گیا ہے۔

فنانشل ٹائمز کے مطابق ٹرمپ سے بہترین ہم آہنگی کا اعزاز بھی فیلڈ مارشل عاصم منیر کو جاتا ہے۔ جریدے نے فیلڈ مارشل عاصم منیر کو مڈل پاورز کے لیے کامیاب کثیر الجہتی حکمت عملی اور سفارت کاری کی واضح مثال قرار دیا ہے۔

رپورٹ کے مطابق پاکستان کی قیادت واشنگٹن، بیجنگ، ریاض اور تہران کے درمیان روابط میں متحرک رہی۔ فیلڈ مارشل نے عالمی سیاست میں پاکستان کے لیے نئے سفارتی مواقع پیدا کیے اور پاکستان کی سفارت کاری کو مؤثر انداز میں آگے بڑھایا۔

فنانشل ٹائمز کے مطابق ٹرمپ کے ساتھ بر وقت خوش گفتاری اور نرم سفارتی رویہ مؤثر ثابت ہوا۔ پاکستان کی اس سفارتی کامیابی نے بھارت کو مایوس کیا، جبکہ بھارت کے لیے درمیانی طاقت کا کھیل توقع سے زیادہ مشکل ثابت ہوا۔

رپورٹ میں مزید کہا گیا ہے کہ بھارت بدلتے عالمی حالات اور ٹرمپ کے انداز سے ہم آہنگ نہ ہو سکا، جس کے باعث سفارتی ناکامی کی صورت میں بھارت کو مڈل پاور حکمت عملی میں مشکلات کا سامنا کرنا پڑا۔