ملک حکومت، پاک فوج اور عوام کی مشترکہ کوششوں سے استحکام اور ترقی کی راہ پر گامزن ہے: فیلڈ مارشل

چیف آف ڈیفنس فورسز اور آرمی چیف فیلڈ مارشل عاصم منیر نے کہا ہے کہ ملک حکومت، پاک فوج اور عوام کی مشترکہ کوششوں سے استحکام اور ترقی کی راہ پر گامزن ہے۔

پاک فوج کے شعبہ تعلقات عامہ (آئی ایس پی آر) کے مطابق 273 ویں کور کمانڈرز کانفرنس راولپنڈی میں فیلڈ مارشل سید عاصم منیر، نشان امتیاز (ملٹری)، ہلال جرات، چیف آف آرمی اسٹاف اور چیف آف ڈیفنس فورسز کی صدارت میں منعقد ہوئی۔

کانفرنس میں حالیہ دہشت گردی کے واقعات میں شہید ہونے والے مسلح افواج، قانون نافذ کرنے والے اداروں اور معصوم شہریوں کے ایصال ثواب کے لیے فاتحہ خوانی کی گئی۔ فورم نے غیر ملکی ایما پر دہشت گردی کے فروغ کے خلاف مادر وطن کی حفاظت کرنے والے شہداء کو خراج عقیدت پیش کیا۔

آرمی چیف نے پاک فوج کی غیر متزلزل جرات، پیشہ ورانہ مہارت اور قربانیوں کو سراہا اور ملک بھر میں انٹیلی جنس پر مبنی انسداد دہشت گردی کی کارروائیوں میں افواج کی پُرعزم کاوشوں کو سراہا۔

انہوں نے کہا کہ حکومت اور پاک فوج کی مشترکہ کوششوں اور عوام کی ثابت قدم حمایت کے باعث ملک بتدریج استحکام، وسیع تر مواقع اور عزت و وقار کی طرف بڑھ رہا ہے۔

شرکاء نے داخلی و خارجی سلامتی کی صورتحال کا جائزہ لیتے ہوئے ملکی خطرات اور آپریشنل تیاریوں پر زور دیا۔ فورم نے بھارتی سرپرستی میں دہشت گردوں، ان کے سہولت کاروں اور معاونین کے ساتھ فیصلہ کن اور بغیر کسی رعایت کے نمٹنے کا عزم دہرایا۔

فورم نے دہشت گردی، جرائم اور سیاسی مفادات کے درمیان گٹھ جوڑ کو یکسر مسترد کیا اور کہا کہ قومی یکجہتی، سلامتی اور استحکام کو نقصان پہنچانے کی کسی کو اجازت نہیں دی جائے گی، چاہے وہ عناصر سیاسی ہوں یا کوئی اور۔

کانفرنس نے بلوچستان حکومت کے خصوصی ترقیاتی اقدامات کو سراہا جو مقامی سطح پر عوام کو بااختیار بنانے اور دہشت گردی کے عوامل کا خاتمہ کرنے میں معاون ہیں۔ شرکاء نے پائیدار امن اور استحکام کو یقینی بنانے کے لیے قومی ایکشن پلان کے مطابق دیگر علاقوں میں بھی ایسے عوامی اقدامات کی ضرورت پر زور دیا۔

فورم نے کشمیری عوام کے حق خودارادیت اور جائز جدوجہد کے لیے پاکستان کی ثابت قدمی کا اعادہ کیا اور مسئلہ فلسطین پر پاکستان کے اصولی موقف کی بھی توثیق کی، جس میں غزہ میں فوری اور مستقل جنگ بندی، بلا روک ٹوک انسانی رسائی اور فلسطینی ریاست کے لیے قابل اعتماد راستہ شامل ہے۔

کانفرنس کے اختتام پر آرمی چیف نے کمانڈرز کو آپریشنل تیاری، نظم و ضبط، تربیت، جسمانی فٹنس، نئی جدتیں اور میدان جنگ میں پیشہ ورانہ مہارت کے اعلیٰ معیار کو برقرار رکھنے کی ہدایت کی۔

انہوں نے پاک فوج کی قومی خودمختاری اور علاقائی سالمیت کا تحفظ کرتے ہوئے ہر طرح کے خطرات سے مؤثر مقابلہ کرنے کی صلاحیت پر مکمل اعتماد کا اظہار کیا۔