9 مئی کے جلاؤ گھیراؤ کے دو مقدمات کا تحریری فیصلہ جاری، محمود الرشید کو 33 سال قید کی سزا

لاہور: انسداد دہشتگردی عدالت نے 9 مئی کو گلبرگ میں ہونے والے جلاؤ گھیراؤ اور گاڑیاں نذرِ آتش کرنے کے دو مقدمات کا تحریری فیصلہ جاری کر دیا۔

فیصلے میں عدالت نے جرم ثابت نہ ہونے پر 23 ملزمان کو بری کر دیا۔ جبکہ پی ٹی آئی رہنماؤں سمیت 7 ملزمان کو قید کی سزائیں سنائی گئی ہیں۔

عدالت نے پی ٹی آئی کے سینئر رہنما میاں محمود الرشید کو مجموعی طور پر 33 سال قید اور 6 لاکھ روپے جرمانے کی سزا سنائی۔ فیصلے میں بتایا گیا کہ میاں محمود الرشید کو مختلف دفعات کے تحت الگ الگ سزائیں دی گئی ہیں۔

تحریری فیصلے کے مطابق ڈاکٹر یاسمین راشد، عمر سرفراز چیمہ اور اعجاز چوہدری کو 10، 10 سال قید کی سزا سنائی گئی ہے۔ عدالت نے قرار دیا کہ یہ رہنما سازش کی میٹنگ میں شامل تھے اور عوام میں انتشار پھیلانے میں کردار ادا کیا۔

فیصلے میں یہ بھی کہا گیا کہ پراسیکیوشن نے واٹس ایپ پیغامات اور 70 سوشل میڈیا اکاؤنٹس کے شواہد عدالت میں پیش کیے۔ ملزمان کے خلاف فارنزک رپورٹس بھی کمرہ عدالت میں پیش کی گئیں۔

عدالت کے مطابق جے آئی ٹی کی تفتیشی ٹیم نے ملزمان کو قصوروار قرار دیا۔ ملزمان نے جے آئی ٹی رپورٹ کو کسی فورم پر چیلنج نہیں کیا۔ باوجود اس کے کہ ملزمان نے حتمی بیانات میں خود کو بے گناہ قرار دیا، عدالت نے شواہد کی بنیاد پر سزائیں سنائیں۔