پی ٹی اے نے فائر وال ہٹانے کی خبروں کی تردید کردی

اسلام آباد میں قومی اسمبلی کی قائمہ کمیٹی برائے انفارمیشن ٹیکنالوجی کے اجلاس میں سوشل میڈیا کو کنٹرول کرنے والے فائر وال کے مبینہ ہٹانے کے معاملے پر بحث ہوئی، تاہم پاکستان ٹیلی کمیونیکیشن اتھارٹی (پی ٹی اے) نے اس کی سختی سے تردید کی ہے۔

اجلاس کے دوران کمیٹی کے رکن صادق میمن نے سوال کیا کہ کیا فائر وال کو 5G اسپیکٹرم نیلامی سے قبل ہٹا دیا گیا ہے۔ اس پر سیکرٹری انفارمیشن ٹیکنالوجی و ٹیلی کام زارار ہاشم نے وضاحت دی کہ ایسا کچھ نہیں ہوا اور نہ ہی کوئی فائر وال یا متعلقہ نظام ہٹایا گیا۔ انہوں نے کہا کہ پی ٹی اے کا ویب مینجمنٹ سسٹم مکمل فعال ہے اور اس سے انٹرنیٹ کی رفتار یا خدمات متاثر نہیں ہوتیں۔

پی ٹی اے کے چیئرمین نے کمیٹی کو بتایا کہ جس نظام کو عام طور پر فائر وال کہا جاتا ہے، وہ حقیقت میں پی ٹی اے کا ویب مینجمنٹ سسٹم ہے۔ یہ نظام 2006 سے فعال ہے اور اب تک چار مرتبہ اپ گریڈ ہو چکا ہے، جن میں سب سے تازہ اپ ڈیٹ 2023 کی ہے۔ اس کا مقصد نیٹ ورک ٹریفک کو کنٹرول کرنا اور ضرورت پڑنے پر سوشل میڈیا پلیٹ فارمز کو بلاک کرنا ہے۔

چیئرمین نے کہا کہ حکومت کے احکامات پر پلیٹ فارم ایکس کو بھی اسی نظام کے تحت بلاک کیا گیا تھا۔ اب تک سات مرتبہ مختلف سوشل میڈیا پلیٹ فارمز کو حکومت یا عدالتوں کے حکم پر معطل کیا جا چکا ہے۔ انہوں نے واضح کیا کہ یہ سسٹم انٹرنیٹ کی رفتار کو سست یا متاثر نہیں کرتا۔

پی ٹی اے کے مطابق ڈیجیٹل سرحدوں کے تحفظ کے لیے ایسے نظام کی موجودگی ضروری ہے۔ ماضی میں بھارت کی طرف سے شروع ہونے والے سائبر حملے بھی اسی میکانزم کے ذریعے ناکام بنائے گئے تھے۔