اہداف حاصل ہونے تک ایران میں کارروائی جاری رہے گی، وائٹ ہاؤس

وائٹ ہاؤس نے اعلان کیا ہے کہ ایران میں جاری امریکی فوجی کارروائی اس وقت تک جاری رہے گی، جب تک صدر کے مقرر کردہ مقاصد مکمل طور پر حاصل نہیں ہو جاتے۔

وائٹ ہاؤس میں بریفنگ کے دوران ترجمان نے کہا کہ موجودہ فوجی آپریشن ایک واضح حکمت عملی کے تحت جاری ہے اور اس کے اختتام کا فیصلہ اس وقت کیا جائے گا، جب مقررہ مقاصد مکمل ہو جائیں گے۔

انہوں نے واضح کیا کہ اس وقت تک امریکی بحریہ نے آبنائے ہرمز سے گزرنے والے کسی تیل بردار جہاز کو باقاعدہ طور پر حفاظتی حصار فراہم نہیں کیا۔

یاد رہے کہ اس سے قبل امریکی توانائی کے محکمے سے منسلک ایک بیان میں کہا گیا تھا کہ امریکی بحریہ نے آبنائے ہرمز سے گزرنے والے ایک تیل بردار جہاز کو بحفاظت راستہ فراہم کیا ہے، تاہم بعد میں اس بیان کو حذف کر دیا گیا اور کہا گیا کہ ویڈیو کلپ کی وضاحت غلط انداز میں درج ہو گئی تھی۔

وائٹ ہاؤس کے مطابق صدر ٹرمپ، توانائی سے متعلق امور کی ٹیم اور متعلقہ حکام خلیج کی صورتحال پر مسلسل نظر رکھے ہوئے ہیں۔

ترجمان نے بتایا کہ امریکی حکومت توانائی کی عالمی منڈی اور صنعتی رہنماؤں سے بھی رابطے میں ہے جبکہ امریکی فوج کو آبنائے ہرمز کو کھلا رکھنے کے لیے مختلف ممکنہ اقدامات پر غور کرنے کی ہدایات دی گئی ہیں۔

یہ بھی پڑھیں : ایران کی جنگی صلاحیتیں ختم کردیں، جنگ جلد ختم ہو جائے گی، ٹرمپ

ان اقدامات میں یہ امکان بھی شامل ہے کہ اگر ضرورت پڑی تو امریکی بحریہ تیل بردار جہازوں کو آبنائے ہرمز سے گزرنے کے لیے حفاظتی حصار فراہم کرے گی۔

امریکی فوج کے سربراہان کی مشترکہ کمیٹی کے چیئرمین جنرل ڈین کین نے بھی کہا ہے کہ اگر حکومت کی جانب سے حکم ملا تو فوج آبنائے ہرمز سے جہازوں کو بحفاظت گزارنے کے لیے مختلف فوجی آپشنز کا جائزہ لے گی۔

امریکی صدر اس سے قبل بھی آبنائے ہرمز میں بحری جہازوں کو تحفظ فراہم کرنے کا امکان ظاہر کر چکے ہیں، تاہم انہوں نے امید ظاہر کی تھی کہ شاید اس کی ضرورت پیش نہ آئے۔

ادھر توانائی کی عالمی منڈی میں بھی اس صورتحال کے اثرات دیکھنے میں آئے۔ ایک بیان کے منظر عام پر آنے کے بعد تیل کی قیمتوں میں فوری کمی دیکھی گئی، تاہم بیان حذف ہونے کے بعد قیمتیں دوبارہ بڑھ گئیں۔

اطلاعات کے مطابق امریکی خام تیل کی قیمت ایک مرحلے پر چوراسی ڈالر فی بیرل سے کم ہو کر تقریباً چھہتر ڈالر فی بیرل تک آ گئی تھی، تاہم بعد میں یہ دوبارہ بڑھ کر تقریباً چوراسی ڈالر کے قریب پہنچ گئی۔