پاکستان سے بیرون ملک جانے والوں کیلئے اہم خبر آگئی

امریکا، اسرائیل اور ایران کے درمیان کشیدگی کے باعث پاکستان سے مشرقِ وسطیٰ کے لیے فلائٹ آپریشن متاثر ہوا تھا۔ تاہم اب صورتحال بتدریج بہتر ہو رہی ہے۔

ایوی ایشن ذرائع کے مطابق گزشتہ دو ہفتوں کے دوران بڑی تعداد میں پروازیں منسوخ ہوئیں۔ اس دوران مجموعی طور پر 1800 سے زائد پروازیں متاثر ہو چکی ہیں۔ آج ملک بھر سے مشرقِ وسطیٰ کے لیے 231 پروازیں شیڈول ہیں، جبکہ 72 پروازیں منسوخ کی گئی ہیں۔

 حکام کے مطابق 14 دن میں منسوخ ہونے والی پروازوں کی تعداد 1811 سے تجاوز کر گئی ہے۔ یہ صورتحال خطے میں جاری کشیدگی اور فضائی حدود کی تبدیلیوں کے باعث پیدا ہوئی۔

کویت ایئرپورٹ پر 13 دن کی بندش کے بعد اب محدود پروازیں بحال ہو گئی ہیں۔ دو پروازیں قاہرہ کے لیے روانہ ہوئیں۔ اس سے مسافروں کو کچھ ریلیف ملا ہے۔

شہری سطح پر بھی پروازوں میں رد و بدل دیکھا گیا۔ کراچی سے دوحہ، بحرین اور کویت کی 14 پروازیں منسوخ ہوئیں جبکہ 64 پروازیں آپریٹ کی جائیں گی۔ لاہور سے دوحہ، کویت، بغداد اور دبئی کی 17 پروازیں منسوخ ہوئیں اور 55 پروازیں جاری رہیں گی۔

اسلام آباد سے آج مشرقِ وسطیٰ کے لیے 25 پروازیں منسوخ کی گئیں جبکہ 64 پروازوں کی آمد و روانگی متوقع ہے۔ پشاور ایئرپورٹ سے 14 پروازیں منسوخ ہوئیں اور 8 پروازیں آپریٹ کی جا رہی ہیں۔

اسی طرح سیالکوٹ، فیصل آباد اور ملتان ایئرپورٹس سے بھی پروازیں متاثر ہوئیں۔ کوئٹہ سے دبئی اور شارجہ کے لیے آج کی تمام پروازیں معمول کے مطابق جاری رہیں۔

 حکام کا کہنا ہے کہ صورتحال پر مسلسل نظر رکھی جا رہی ہے اور فضائی آپریشن کو مکمل طور پر معمول پر لانے کی کوشش جاری ہے۔