گوگل میپس کا وہ بہترین فیچر جس کا علم بہت کم افراد کو ہے

گوگل میپس کو عام طور پر لوگ راستہ تلاش کرنے یا نئی جگہیں ڈھونڈنے کے لیے استعمال کرتے ہیں، مگر اب یہ ایپ روزمرہ زندگی میں اور بھی زیادہ کارآمد ثابت ہو رہی ہے۔

 خاص طور پر سفر کے دوران یہ صارفین کے لیے ایک بڑی سہولت بن چکی ہے۔ اب آپ اس کے ذریعے اپنے قریب موجود پیٹرول پمپس بھی آسانی سے تلاش کر سکتے ہیں، جو کہ ہنگامی صورتحال میں بہت مددگار ثابت ہوتا ہے۔

اکثر ایسا ہوتا ہے کہ دورانِ سفر اچانک گاڑی یا موٹرسائیکل کا پیٹرول کم ہونے لگتا ہے۔ ایسے وقت میں سب سے بڑا مسئلہ یہ ہوتا ہے کہ قریبی پیٹرول پمپ کہاں ہے۔ اس صورتحال میں گوگل میپس آپ کی فوری رہنمائی کرتا ہے۔ یہ نہ صرف آپ کو قریبی پمپ کا مقام دکھاتا ہے بلکہ وہاں تک پہنچنے کا راستہ بھی واضح کرتا ہے۔

اس فیچر کو استعمال کرنا بھی بہت آسان ہے۔ آپ کو صرف اپنے موبائل میں گوگل میپس ایپ کھولنی ہے۔ اس کے بعد سرچ بار کے نیچے موجود مختلف آپشنز کو دیکھیں۔ وہاں آپ کو ریسٹورنٹس، شاپنگ اور دیگر کیٹیگریز کے ساتھ ایک “گیس” کا آپشن بھی نظر آئے گا۔ اس آپشن پر کلک کرتے ہی آپ کے اردگرد موجود تمام پیٹرول پمپس نقشے پر ظاہر ہو جائیں گے۔ ہر پمپ کے ساتھ اس کا مقام سرخ نشان کے ذریعے دکھایا جاتا ہے۔

مزید سہولت کے لیے آپ کسی بھی پیٹرول پمپ پر کلک کر کے اس کی مکمل تفصیلات بھی دیکھ سکتے ہیں۔ جیسے کہ وہ کتنے بجے کھلتا اور بند ہوتا ہے، وہاں تک جانے کا راستہ کیا ہے، اور بعض صورتوں میں صارفین کی رائے بھی دستیاب ہوتی ہے۔ اس طرح آپ بہتر فیصلہ کر سکتے ہیں کہ کس پمپ کا رخ کیا جائے۔

دلچسپ بات یہ ہے کہ کچھ ممالک میں اس فیچر کے ذریعے پیٹرول کی قیمتیں بھی دیکھی جا سکتی ہیں، تاہم پاکستان میں ابھی یہ سہولت دستیاب نہیں ہے۔ اس کے باوجود یہ فیچر ڈرائیورز کے لیے کافی مفید ہے اور سفر کو آسان بناتا ہے۔ ٹیکنالوجی کے اس استعمال سے نہ صرف وقت کی بچت ہوتی ہے بلکہ غیر ضروری پریشانی سے بھی نجات ملتی ہے۔