پاسپورٹ وصولی کے اوقات اور فیسوں میں بڑی تبدیلی

عمان میں مقیم پاکستانی شہریوں کے لیے پاسپورٹ سے متعلق اہم اپڈیٹ سامنے آئی ہے۔

 سفارت خانہ پاکستان نے پاسپورٹ وصولی کے اوقات کار میں تبدیلی کے ساتھ نئی فیسوں کا بھی اعلان کر دیا ہے۔ اس فیصلے کا مقصد قونصلر خدمات کو مزید بہتر بنانا اور دفاتر میں رش کو کم کرنا ہے۔

سفارت خانے کے مطابق نئے اوقات کار کا اطلاق یکم مئی 2026 سے ہوگا۔ شہری اتوار سے جمعرات تک دو مختلف اوقات میں اپنے تیار شدہ پاسپورٹ وصول کر سکیں گے۔ پہلا وقت دوپہر 1 بجے سے 2 بجے تک رکھا گیا ہے جبکہ دوسرا وقت سہ پہر 3 بجے سے 4 بجے تک مقرر کیا گیا ہے۔

حکام نے واضح کیا ہے کہ پاسپورٹ وصول کرتے وقت شہریوں کو اصل ٹوکن اور پرانا پاسپورٹ ساتھ لانا لازمی ہوگا۔ بغیر ان دستاویزات کے پاسپورٹ جاری نہیں کیا جائے گا۔

سفارت خانے نے پاسپورٹ فیس کی تفصیلات بھی جاری کی ہیں۔ 5 سالہ مدت کے 36 صفحات والے پاسپورٹ کی نارمل فیس 12 عمانی ریال جبکہ ارجنٹ فیس 19 ریال مقرر کی گئی ہے۔ اسی طرح 10 سالہ مدت کے 36 صفحات والے پاسپورٹ کی فیس 17 ریال سے شروع ہوتی ہے۔

مزید یہ بھی بتایا گیا ہے کہ پاسپورٹ گم ہونے کی صورت میں جرمانہ ادا کرنا ہوگا۔ پہلی بار گمشدگی پر دوگنی فیس لی جائے گی جبکہ دوسری بار گم ہونے پر فیس چار گنا تک بڑھ سکتی ہے۔ مثال کے طور پر اگر کوئی شہری دوسری بار پاسپورٹ گم کرے تو 100 صفحات والے ارجنٹ پاسپورٹ کی فیس 208 عمانی ریال تک پہنچ سکتی ہے۔