پیٹرول مہنگا ہو یا سستا؟ وزیر اعظم نے بتادیا

وزیراعظم شہباز شریف نے کابینہ کے اہم اجلاس میں ملک کی موجودہ معاشی اور سفارتی صورتحال پر تفصیلی گفتگو کی۔

 وزیراعظم شہباز شریف نے اجلاس کے دوران بتایا کہ حکومت آنے والے جمعہ کو پیٹرولیم مصنوعات کی قیمتوں کا ازسرِنو جائزہ لے گی اور نئی قیمتوں کا اعلان کیا جائے گا۔

انہوں نے کہا کہ عالمی منڈی میں تیل کی قیمتوں میں مسلسل اضافہ ہو رہا ہے، جس کے باعث پاکستان کو شدید مالی دباؤ کا سامنا ہے۔ موجودہ حالات غیر معمولی ہیں اور حکومت کو مشکل فیصلے کرنا پڑ رہے ہیں۔

اجلاس میں وزیراعظم نے سفارتی پیش رفت کا بھی ذکر کیا۔ انہوں نے بتایا کہ امریکہ اور ایران کے درمیان حالیہ مذاکرات میں پاکستان نے اہم کردار ادا کیا۔ اسلام آباد میں ہونے والی طویل نشست کے نتیجے میں کشیدگی کم کرنے میں مدد ملی اور جنگ بندی میں توسیع ممکن ہوئی۔

انہوں نے کہا کہ ایرانی وزیر خارجہ مختلف ممالک کے دورے کر رہے ہیں اور اپنی قیادت سے مشاورت کے بعد آئندہ کا لائحہ عمل طے کریں گے۔ اس دوران خطے کی صورتحال پر گہری نظر رکھی جا رہی ہے۔

وزیراعظم نے معاشی بوجھ کی وضاحت کرتے ہوئے کہا کہ پہلے پاکستان کا ہفتہ وار تیل کا بل تقریباً 30 کروڑ ڈالر تھا، جو اب بڑھ کر 80 کروڑ ڈالر تک پہنچ گیا ہے۔ اس کے باوجود حکومت نے بیرونی قرضوں کی ادائیگی جاری رکھی اور تقریباً ساڑھے 3 ارب ڈالر واپس کیے۔

انہوں نے سعودی عرب کے تعاون کا شکریہ ادا کیا اور کہا کہ مشکل وقت میں دوست ممالک کا ساتھ حوصلہ افزا ہے۔ اس کے علاوہ وزیر پیٹرولیم کی کارکردگی کو بھی سراہا گیا۔

وزیراعظم نے بتایا کہ عوام کو ریلیف دینے کے لیے پبلک ٹرانسپورٹ سمیت مختلف شعبوں میں سبسڈی جاری رکھنے پر غور کیا جا رہا ہے۔ ساتھ ہی پی آئی اے کی نجکاری کے عمل کا بھی جائزہ لیا گیا ہے تاکہ قومی اداروں کو بہتر بنایا جا سکے۔