عالمی امن کیلئے پاکستان کی مؤثر سفارتکاری، اسرائیل اور بھارت کی منظم اور گمراہ کن پروپیگنڈا مہم بے نقاب

امریکہ ایران مذاکرات میں پاکستان کے مؤثر سفارتی کردار کے فوری بعد پاکستان مخالف پروپیگنڈا مہم میں اچانک تیزی آئی۔

ماہرین کے مطابق یہ محض اتفاق نہیں بلکہ ایک منظم حکمتِ عملی کا حصہ ہے جس کے پیچھے اسرائیلی لابی اور بھارتی گٹھ جوڑ کارفرما ہے۔

حالیہ دنوں میں امریکی نشریاتی ادارے CBS نے ایرانی طیاروں کی پاکستان میں موجودگی کی من گھڑت خبر چلائی جس کا حقیقت سے کوئی تعلق نہیں تھا۔ اسی طرح افغانستان میں ری ہیبلٹیشن سنٹر پر حملے کی سراسر جھوٹی خبر بھی پھیلائی گئی۔ قابلِ غور بات یہ ہے کہ CBS پیراماؤنٹ گلوبل کی ملکیت ہے جو ریلائنس نیٹ ورکس سے منسلک ہے — اور یہ ادارہ بھارتی ارب پتی مکیش امبانی کی ملکیت ہے۔

ماہرین کے مطابق BBC، رائٹرز اور دیگر بین الاقوامی میڈیا پلیٹ فارمز بیک وقت پاکستان میں عدم استحکام اور دہشتگردی کے حوالے سے حقائق کے برعکس بیانیہ سازی میں مصروف ہیں۔ یہ مربوط پروپیگنڈا مہم پاکستان کی بڑھتی ہوئی سفارتی ساکھ کو نقصان پہنچانے کی کوشش ہے۔

اسرائیل اور بھارت کے مشترکہ مفادات خطے میں کشیدگی اور مسلسل جنگی ماحول سے وابستہ ہیں — پاکستان کی امن کوششیں اور ثالثی کا کردار انہیں براہِ راست کھٹکتا ہے۔ جب پاکستان امریکہ اور ایران کے درمیان سفارتی پل کا کردار ادا کرے اور عالمی سطح پر اس کی ساکھ مضبوط ہو تو وہ طاقتیں جن کا مفاد عدم استحکام میں ہے، ایسے ردعمل دیتی ہیں۔

ماہرین نے واضح کیا کہ بین الاقوامی ذرائع ابلاغ کو صحافتی اقدار کی پاسداری کرتے ہوئے کسی بھی پروپیگنڈا مہم کا آلہ کار نہیں بننا چاہیے۔ پاکستان پہلے بھی عالمی فورمز پر ثبوتوں کے ساتھ بھارتی پاکستان مخالف سرگرمیاں بے نقاب کر چکا ہے۔

یہ صورتحال بتاتی ہے کہ جب کوئی ملک عالمی امن کے لیے مخلصانہ کردار ادا کرے تو مخالف قوتیں میدانِ جنگ کی بجائے میڈیا وار کا رخ اختیار کرتی ہیں — اور یہی پاکستان کے ساتھ ہو رہا ہے۔