وزیراعلیٰ خیبرپختونخوا کا وزیراعظم کو خط، سی این جی سیکٹر کو گیس کی فوری بحالی کا مطالبہ

وزیراعلیٰ خیبرپختونخوا نے وزیراعظم کو ایک خط لکھ کر صوبے کے سی این جی سیکٹر کو گیس کی فراہمی کی فوری بحالی اور پشاور ہائیکورٹ کے فیصلوں پر عملدرآمد کا مطالبہ کیا ہے۔

خیبرپختونخوا کے وزیراعلیٰ سہیل آفریدی نے وزیراعظم پاکستان کو خط ارسال کیا ہے، جس میں خیبرپختونخوا کے سی این جی سیکٹر کو گیس کی فراہمی کی طویل معطلی اور بندش کا مسئلہ فوری طور پر حل کرنے کا پرزور مطالبہ کیا ہے۔

وزیراعلیٰ نے خط میں وفاق کو یاد دلایا ہے کہ خیبرپختونخوا ملک میں قدرتی گیس پیدا کرنے والا سب سے بڑا صوبہ ہے، اس لیے اسے اس کے بنیادی آئینی اور قانونی حق سے کسی صورت محروم نہ کیا جائے۔

انہوں نے خط کے ذریعے وفاق کو آگاہ کیا کہ پشاور ہائیکورٹ بھی صوبے میں سی این جی اسٹیشنز کی اس طرح کی طویل بندش کو مکمل طور پر غیر منصفانہ اور آئین کے خلاف قرار دے چکی ہے، لہذا عدالتی فیصلے کا احترام کیا جائے۔

یہ بھی پڑھیں : خیبر پختونخوا میں غیر رجسٹرڈ گاڑیوں اور موٹر سائیکلوں کے خلاف بڑا کریک ڈاؤن شروع

خط میں خدشہ ظاہر کیا گیا ہے کہ سی این جی سیکٹر کی مسلسل بندش سے صوبے کے ہزاروں غریب افراد کے روزگار اور نوکریاں مستقل طور پر متاثر ہونے کا خطرہ پیدا ہو چکا ہے، جس سے بے روزگاری میں اضافہ ہوگا۔

خط کے مطابق پشاور اور صوبے کے دیگر اضلاع کا پبلک ٹرانسپورٹ سیکٹر یعنی عوامی گاڑیاں بہت بڑی حد تک سستے ایندھن یعنی سی این جی پر انحصار کرتی ہیں، اس لیے غریب عوام کی سہولت کے لیے گیس کی فوری بحالی ناگزیر ہو چکی ہے۔

وزیراعلیٰ خیبرپختونخوا نے خط کے آخر میں واضح کیا کہ سی این جی کی بندش کی وجہ سے ٹرانسپورٹرز کو مجبوراً مہنگا ایندھن جیسے پٹرول اور ڈیزل استعمال کرنا پڑ رہا ہے، جس کے نتیجے میں کرایوں میں اضافہ ہوگا اور مہنگائی کی چکی میں پسنے والے عوام پر مزید اضافی مالی بوجھ پڑے گا، جو وفاق کی غلط پالیسیوں کا نتیجہ ہے۔