پانی کی بوند بوند کو ترستے کراچی والوں کیلئے پھر بُری خبر آگئی

 واٹر کارپوریشن کے مطابق بجلی کے اچانک بریک ڈاؤن کے باعث شہر کو روزانہ 54 ملین گیلن پانی کی کمی کا سامنا کرنا پڑ رہا ہے۔ اس صورتحال نے مختلف علاقوں میں پانی کی فراہمی کو متاثر کر دیا ہے، جس سے شہریوں کو مشکلات پیش آ رہی ہیں۔

واٹر کارپوریشن کے ترجمان نے بتایا کہ بجلی کی معطلی کے باعث کے ٹو پمپنگ اسٹیشن کی سرگرمیاں متاثر ہوئیں۔ پمپنگ سسٹم مکمل طور پر فعال نہ رہنے کی وجہ سے شہر کے متعدد علاقوں میں پانی کی سپلائی کم ہو گئی۔

ترجمان کے مطابق جیسے ہی بجلی کی خرابی سامنے آئی، واٹر کارپوریشن نے فوری طور پر کے الیکٹرک سے رابطہ کیا۔ اطلاع ملنے پر کے الیکٹرک کی تکنیکی ٹیم موقع پر پہنچی اور ابتدائی جانچ کے دوران پمپنگ اسٹیشن کی مرکزی کیبل میں فالٹ کی تصدیق کی گئی۔

صورتحال سے نمٹنے کے لیے واٹر کارپوریشن نے ہنگامی اقدامات کرتے ہوئے متبادل فیڈر کے ذریعے بجلی بحال کرنے کی کوشش کی۔ اس انتظام کے نتیجے میں صبح کے وقت جزوی بجلی بحال ہو گئی، تاہم پمپنگ آپریشن مکمل طور پر بحال نہ ہو سکا۔ محدود برقی استعداد کے باعث پانی کی فراہمی ابھی تک معمول پر نہیں آ سکی۔

حکام کا کہنا ہے کہ جب تک مرکزی فالٹ مکمل طور پر درست نہیں ہو جاتا، عارضی نظام کے ذریعے پمپنگ کا عمل جاری رکھا جائے گا۔ تاہم موجودہ حالات میں شہر کو پانی کی فراہمی میں مزید کمی کا خدشہ بھی موجود ہے۔ واٹر کارپوریشن کی ٹیمیں پانی کی ترسیل کو بہتر بنانے کے لیے مسلسل کام کر رہی ہیں۔