پاسپورٹ بنوانے والوں کیلئے بڑی خوشخبری آگئی

پاکستان میں پاسپورٹ فیس کی ادائیگی کے نظام کو مزید جدید اور آسان بنانے کے لیے اہم پیش رفت سامنے آئی ہے۔

نادرا اور امیگریشن اینڈ پاسپورٹس کے درمیان تعاون بڑھانے پر اتفاق کیا گیا ہے، جس کے بعد شہریوں کو فیس جمع کروانے کے لیے مزید ڈیجیٹل سہولتیں فراہم کیے جانے کا امکان ہے۔

اس حوالے سے ڈائریکٹر جنرل امیگریشن اینڈ پاسپورٹس محمد علی رندھاوا نے نادرا ہیڈکوارٹرز میں چیئرمین نادرا لیفٹیننٹ جنرل محمد منیر افسر سے ملاقات کی۔ جس میں دونوں اداروں کے درمیان جاری تعاون کا جائزہ لیا گیا اور مختلف شعبوں میں رابطوں کو مزید مضبوط بنانے پر اتفاق کیا گیا۔

ملاقات میں پاسپورٹ فیس کی ادائیگی کے طریقہ کار کو جدید خطوط پر استوار کرنے پر خصوصی توجہ دی گئی۔ حکام نے کیو آر کوڈ کے ذریعے فیس کی ادائیگی کی سہولت کو مزید مؤثر بنانے پر تبادلہ خیال کیا۔ اس کے تحت شہری جاز کیش، ایزی پیسہ اور ون لنک جیسے ڈیجیٹل پلیٹ فارمز کے ذریعے آسانی سے فیس ادا کر سکیں گے۔

حکام کا کہنا ہے کہ اس اقدام سے شہریوں کو بینکوں میں طویل قطاروں سے نجات ملے گی اور فیس جمع کروانے کا عمل پہلے سے زیادہ تیز اور آسان ہو جائے گا۔ ڈیجیٹل ادائیگیوں کے فروغ سے شفافیت میں بھی اضافہ ہوگا اور سرکاری خدمات تک رسائی بہتر بنائی جا سکے گی۔

ملاقات کے دوران محکمانہ امور اور مختلف ڈیجیٹل اصلاحات پر بھی تفصیلی گفتگو کی گئی۔ اس موقع پر ڈیٹا انٹری کے عمل کو مزید تیز اور مؤثر بنانے کی تجاویز زیر غور آئیں۔ اس کے علاوہ امیگریشن اینڈ پاسپورٹس کے ترقیاتی منصوبوں اور مستقبل کے اہداف کا بھی جائزہ لیا گیا۔

دوسری جانب حال ہی میں ڈی جی امیگریشن اینڈ پاسپورٹس محمد علی رندھاوا نے اسلام آباد میں واقع ریجنل پاسپورٹ آفس جی-10 کا دورہ بھی کیا تھا۔ دورے کے دوران انہوں نے شہریوں کو فراہم کی جانے والی سہولتوں کا معائنہ کیا اور سروسز کے معیار کا جائزہ لیا۔

ترجمان کے مطابق محمد علی رندھاوا نے دفتر میں موجود شہریوں سے براہ راست ملاقات کی۔ انہوں نے درخواست گزاروں کے مسائل اور شکایات سنی اور متعلقہ افسران کو فوری اقدامات کی ہدایت جاری کی۔ اس موقع پر عوامی سہولت کو مزید بہتر بنانے کے لیے مختلف تجاویز پر بھی غور کیا گیا۔

انہوں نے پاسپورٹ دفاتر میں نافذ کیے گئے کیش لیس نظام کا بھی جائزہ لیا اور اس کی کارکردگی پر اطمینان کا اظہار کیا۔ حکومت سرکاری خدمات کو مکمل طور پر ڈیجیٹل بنانے کے لیے مختلف اقدامات کر رہی ہے تاکہ شہریوں کو تیز، شفاف اور آسان سہولتیں فراہم کی جا سکیں۔