حکومت نے 8 جون کو عام تعطیل کا اعلان کردیا

کراچی میں حضرت عبداللہ شاہ غازیؒ کے سالانہ عرس کے موقع پر مقامی تعطیل کا اعلان کر دیا گیا ہے۔

 کراچی میٹروپولیٹن کارپوریشن (کے ایم سی) کی جانب سے جاری کردہ نوٹیفکیشن کے مطابق 8 جون 2026 کو شہر میں مقامی تعطیل ہوگی۔ اس فیصلے کے بعد کے ایم سی کے ماتحت تمام دفاتر ایک روز کے لیے بند رہیں گے۔

حکام کے مطابق تعطیل کا فیصلہ سٹی کونسل کراچی کی منظور شدہ قرارداد کی روشنی میں کیا گیا ہے۔ اس حوالے سے تمام متعلقہ اداروں اور محکموں کو باقاعدہ طور پر آگاہ کر دیا گیا ہے تاکہ نوٹیفکیشن پر مکمل عملدرآمد یقینی بنایا جا سکے۔

کے ایم سی کی جانب سے جاری اعلامیے میں واضح کیا گیا ہے کہ ضروری اور ہنگامی خدمات فراہم کرنے والے ادارے معمول کے مطابق کام کرتے رہیں گے۔ اس اقدام کا مقصد یہ ہے کہ شہریوں کو صفائی، ایمرجنسی، صحت اور دیگر بنیادی سہولیات کی فراہمی میں کسی قسم کی پریشانی کا سامنا نہ کرنا پڑے۔

حضرت عبداللہ شاہ غازیؒ کا مزار کراچی کے اہم مذہبی مراکز میں شمار ہوتا ہے۔ ہر سال عرس کی تقریبات میں کراچی سمیت ملک کے مختلف شہروں سے ہزاروں عقیدت مند شرکت کرتے ہیں۔

انتظامیہ کی جانب سے زائرین کی سہولت اور سیکیورٹی کے لیے خصوصی انتظامات بھی کیے جاتے ہیں۔ ٹریفک کی روانی برقرار رکھنے، ہجوم کو منظم کرنے اور امن و امان کی صورتحال کو یقینی بنانے کے لیے متعلقہ ادارے مشترکہ حکمت عملی اختیار کرتے ہیں۔