وزیرخزانہ نے عوام کو مہنگائی میں کمی سے متعلق بڑی خوشخبری سنادی

وفاقی وزیر خزانہ محمد اورنگزیب نے کہا کہ مشرق وسطیٰ میں جاری کشیدگی ختم ہونے کے بعد مہنگائی کی شرح میں واضح کمی متوقع ہے۔

قومی اسمبلی میں آئندہ مالی سال کا بجٹ پیش کرتے ہوئے وزیر خزانہ نے موجودہ معاشی صورتحال پر تفصیل سے روشنی ڈالی۔ انکا کہنا تھا کہ اگرچہ خطے میں غیر یقینی صورتحال موجود رہی، لیکن اس کے باوجود مہنگائی کی مجموعی شرح قابو میں رکھنے کی کوشش کی گئی ہے۔

انہوں نے بتایا کہ رواں مالی سال کے دوران مہنگائی کی اوسط شرح تقریباً 7 فیصد رہنے کی توقع ہے۔ یہ شرح پہلے کے تخمینے 7.5 فیصد سے کم ہے، جو معاشی استحکام کی ایک علامت ہے۔

وزیر خزانہ کے مطابق حالیہ مہینوں میں افراط زر میں کچھ اضافہ دیکھا گیا، جس کی بڑی وجہ مشرق وسطیٰ میں بڑھتی ہوئی کشیدگی اور عالمی منڈی میں تیل کی قیمتوں میں اتار چڑھاؤ ہے۔

انہوں نے کہا کہ توانائی کی قیمتیں اور عالمی سیاسی صورتحال ترقی پذیر ممالک کی معیشتوں پر براہ راست اثر ڈالتی ہیں۔ پاکستان بھی ان اثرات سے مکمل طور پر محفوظ نہیں رہ سکتا۔

محمد اورنگزیب نے کہا کہ جیسے ہی مشرق وسطیٰ میں جنگی حالات میں بہتری آئے گی اور کشیدگی کم ہوگی، ویسے ہی عالمی سطح پر تیل کی قیمتوں میں استحکام آئے گا، جس سے پاکستان میں مہنگائی کی شرح بھی نیچے آ سکتی ہے۔