بیرون ملک سفر کے خواہشمند پاکستانیوں کیلئے بڑی خوشخبری

بیرون ملک سفر کرنے والے پاکستانیوں کے لیے وفاقی بجٹ 2026-27 میں ایک اہم ریلیف تجویز کیا گیا ہے۔

حکومت نے بزنس کلاس فضائی ٹکٹوں پر عائد فیڈرل ایکسائز ڈیوٹی میں نمایاں کمی کی تجویز پیش کی ہے، جس سے بین الاقوامی سفر کے اخراجات کم ہونے کی امید ہے۔

بجٹ دستاویزات کے مطابق امریکا جانے والے بزنس کلاس مسافروں کے لیے فیڈرل ایکسائز ڈیوٹی میں بڑی کمی تجویز کی گئی ہے۔ اس مد میں ڈیوٹی 3 لاکھ 50 ہزار روپے سے کم کرکے صرف 50 ہزار روپے کرنے کی سفارش کی گئی ہے۔

اسی طرح مشرق وسطیٰ اور افریقی ممالک کے لیے سفر کرنے والے بزنس کلاس مسافروں کو بھی ریلیف دینے کا فیصلہ کیا گیا ہے۔ ان روٹس پر فیڈرل ایکسائز ڈیوٹی ایک لاکھ 5 ہزار روپے سے کم کرکے 25 ہزار روپے مقرر کرنے کی تجویز دی گئی ہے۔

مجوزہ بجٹ کے مطابق یورپ کے لیے بزنس کلاس ٹکٹوں پر ڈیوٹی 2 لاکھ 10 ہزار روپے سے کم کرکے 40 ہزار روپے کرنے کی سفارش کی گئی ہے۔ اسی طرح آسٹریلیا اور مشرق بعید کے ممالک کے لیے بھی فیڈرل ایکسائز ڈیوٹی 40 ہزار روپے مقرر کرنے کی تجویز دی گئی ہے۔

فیڈرل بورڈ آف ریونیو (ایف بی آر) کے مطابق ٹیکس میں مجوزہ کمی سے بین الاقوامی سفر کی حوصلہ افزائی ہوگی۔ اس کے نتیجے میں فضائی کمپنیوں کی سرگرمیوں میں اضافہ اور ایوی ایشن انڈسٹری کی ترقی متوقع ہے۔