واٹس ایپ میں اب فون نمبر شیئر کیے بغیر بھی چیٹ ممکن

واٹس ایپ نے اپنے صارفین کے لیے ایک اہم اور مفید فیچر متعارف کروانے کا اعلان کیا ہے۔

نئی سہولت کے تحت صارفین مستقبل میں اپنا موبائل نمبر ظاہر کیے بغیر بھی دوسرے افراد سے رابطہ کر سکیں گے۔ کمپنی کا کہنا ہے کہ اس تبدیلی کا مقصد صارفین کی پرائیویسی کو مزید بہتر بنانا اور انہیں اپنی شناخت پر زیادہ کنٹرول فراہم کرنا ہے۔

واٹس ایپ کی جانب سے جاری تفصیلات کے مطابق آئندہ چند ماہ کے دوران صارفین کو منفرد یوزر نیم (Username) بنانے کی سہولت دی جائے گی۔ اس یوزر نیم کے ذریعے لوگ ایک دوسرے کو تلاش کر سکیں گے اور چیٹ بھی کر سکیں گے۔ اس کے بعد ہر نئے رابطے کے لیے فون نمبر شیئر کرنا ضروری نہیں رہے گا، خاص طور پر ایسے افراد کے لیے جو گروپ چیٹس میں اپنی ذاتی معلومات محفوظ رکھنا چاہتے ہیں۔

کمپنی کے مطابق صارفین ایپ میں اپنا یوزر نیم ریزرو کر سکیں گے۔ یہ فیچر اختیاری ہوگا، یعنی اگر کوئی صارف یوزر نیم استعمال نہیں کرنا چاہتا تو اس پر کوئی پابندی نہیں ہوگی۔ اسی طرح صارفین اپنی ضرورت کے مطابق کسی بھی وقت اپنا یوزر نیم تبدیل یا مکمل طور پر حذف بھی کر سکیں گے۔

واٹس ایپ نے واضح کیا ہے کہ ہر یوزر نیم زیادہ سے زیادہ 35 حروف پر مشتمل ہوگا۔ اس کے علاوہ مشہور شخصیات، سرکاری عہدیداروں اور معروف برانڈز سے ملتے جلتے بعض نام عام صارفین کے لیے دستیاب نہیں ہوں گے۔ اس اقدام کا مقصد جعلی اکاؤنٹس اور شناخت کے غلط استعمال کو روکنا ہے۔

واٹس ایپ کی ہیڈ آف پروڈکٹ ایلس نیوٹن ریکس کا کہنا ہے کہ بہت سے صارفین، خاص طور پر گروپ چیٹس میں، اپنا فون نمبر دوسروں کو دکھانے سے گریز کرتے تھے۔ نئے فیچر کے بعد وہ اپنی مرضی کے مطابق صرف یوزر نیم کے ذریعے رابطہ کر سکیں گے، جس سے ان کی ذاتی معلومات زیادہ محفوظ رہیں گی۔