ایپل کا فولڈ ایبل موبائل فون کب لانچ ہوگا؟ خصوصی فیچرز اور قیمت سامنے آ گئی

ایپل کے پہلے فولڈ ایبل آئی فون کا انتظار کرنے والے صارفین کے لیے اہم خبر سامنے آ گئی ہے۔

 بین الاقوامی ٹیک رپورٹس کے مطابق کمپنی رواں سال ستمبر میں اپنی نئی فولڈ ایبل ڈیوائس متعارف کروا سکتی ہے۔ تاہم محدود پیداوار کی وجہ سے اس فون کی فوری دستیابی ہر صارف کے لیے ممکن نہیں ہوگی اور بڑی تعداد میں خریداروں کو 2027 تک انتظار کرنا پڑ سکتا ہے۔

رپورٹس کے مطابق ایپل اپنے پہلے فولڈ ایبل فون کو آئی فون الٹرا کے نام سے پیش کرنے پر غور کر رہا ہے۔ ڈیوائس میں 5.5 انچ کی بیرونی اسکرین دیے جانے کا امکان ہے، جبکہ فولڈ کھولنے پر تقریباً 7.8 انچ کا ڈسپلے استعمال کیا جا سکے گا۔

قیمت کے حوالے سے موصول ہونے والی معلومات کے مطابق فولڈ ایبل آئی فون کی متوقع قیمت 2300 سے 2500 امریکی ڈالر کے درمیان ہو سکتی ہے۔ پاکستانی کرنسی میں یہ رقم تقریباً 6 لاکھ 44 ہزار سے 7 لاکھ روپے بنتی ہے۔ اگر یہ اندازے درست ثابت ہوئے تو یہ ایپل کی تاریخ کا سب سے مہنگا آئی فون ہوگا۔

ٹیکنالوجی کے معروف تجزیہ کار منگ چی کوو نے بھی اس منصوبے کے بارے میں اہم پیشگوئی کی ہے۔ ان کے مطابق ایپل ستمبر میں فون کی رونمائی تو کر سکتا ہے، لیکن سپلائی چین میں محدود اسٹاک کی وجہ سے پری آرڈر اور باقاعدہ فروخت کچھ عرصے بعد شروع ہونے کا امکان ہے۔ یہ صورتحال کسی حد تک iPhone X جیسی ہو سکتی ہے، جس کا اعلان وقت پر کیا گیا تھا مگر فروخت بعد میں شروع ہوئی تھی۔

ماہرین کے مطابق ایپل فولڈ ایبل فون کے شعبے میں اس وقت قدم رکھ رہا ہے جب دیگر بڑی کمپنیاں پہلے ہی متعدد فولڈ ایبل ڈیوائسز متعارف کروا چکی ہیں۔ اس لیے کمپنی اپنی پہلی ڈیوائس کو پریمیم معیار، مضبوط ہارڈویئر اور منفرد صارف تجربے کے ساتھ پیش کرنا چاہتی ہے۔ محدود پیداوار بھی اسی حکمت عملی کا حصہ سمجھی جا رہی ہے تاکہ ابتدائی مرحلے میں معیار کو ترجیح دی جا سکے۔