جیٹ فیول کی قیمت میں 6 روپے 23 پیسے فی لیٹر اضافہ

وفاقی حکومت نے پیٹرولیم مصنوعات کی قیمتوں میں حالیہ اضافے کے بعد ایک اور اہم فیصلہ کرتے ہوئے ایوی ایشن ٹربائن فیول (جیٹ فیول) کی قیمت بھی بڑھا دی ہے۔

 وزارتِ خزانہ کی جانب سے جاری کیے گئے نوٹیفکیشن کے مطابق جیٹ فیول کی قیمت میں 6 روپے 23 پیسے فی لیٹر اضافہ کیا گیا ہے۔ اس اضافے کے بعد نئی قیمت 237 روپے 97 پیسے فی لیٹر مقرر کر دی گئی ہے۔

جیٹ فیول کسی بھی فضائی کمپنی کے آپریٹنگ اخراجات کا ایک اہم حصہ ہوتا ہے۔ اس کی قیمت بڑھنے سے ایئر لائنز کی مجموعی لاگت میں نمایاں اضافہ ہو جاتا ہے۔ یہی وجہ ہے کہ فضائی کمپنیاں اضافی مالی بوجھ کو پورا کرنے کے لیے اندرونِ ملک اور بین الاقوامی پروازوں کے کرایوں میں اضافہ یا فیول سرچارج نافذ کر سکتی ہیں۔ اگر ایسا ہوتا ہے تو فضائی سفر پہلے کے مقابلے میں مزید مہنگا ہو جائے گا۔

اس فیصلے کا براہِ راست اثر ان لاکھوں مسافروں پر پڑ سکتا ہے جو کاروباری مقاصد، سیاحت، تعلیم، علاج یا مذہبی سفر کے لیے ہوائی سفر کرتے ہیں۔ عمرہ اور حج پر جانے والے زائرین بھی ممکنہ طور پر زیادہ فضائی کرایوں کا سامنا کر سکتے ہیں۔ اسی طرح بیرونِ ملک مقیم پاکستانی، جو مستقل بنیادوں پر پاکستان آتے جاتے ہیں، ان کے سفری اخراجات میں بھی اضافہ ہونے کا امکان ہے۔

جیٹ فیول مہنگا ہونے سے صرف مسافر ہی متاثر نہیں ہوں گے بلکہ ایئر کارگو سروسز کی لاگت بھی بڑھ سکتی ہے۔ فضائی راستے سے درآمد اور برآمد ہونے والے سامان کی ترسیل مزید مہنگی ہونے کا خدشہ ہے۔ اس کے نتیجے میں مختلف تجارتی شعبوں، درآمد کنندگان اور برآمد کنندگان پر اضافی مالی دباؤ پڑ سکتا ہے، جس کے اثرات بعض اشیائے ضروریہ کی قیمتوں تک بھی پہنچ سکتے ہیں۔

واضھ رہے کہ حکومت پہلے ہی پیٹرول اور ہائی اسپیڈ ڈیزل کی قیمتوں میں نمایاں اضافہ کر چکی ہے۔ حالیہ نوٹیفکیشن کے تحت پیٹرول کی قیمت میں 13 روپے 18 پیسے جبکہ ہائی اسپیڈ ڈیزل کی قیمت میں 13 روپے 80 پیسے فی لیٹر اضافہ کیا گیا تھا۔

اس کے علاوہ پیٹرول پرعائد پیٹرولیم لیوی بھی بڑھا کر 80 روپے فی لیٹر کر دی گئی ہے، جس سے عوام پر ایندھن کا مالی بوجھ مزید بڑھ گیا ہے۔