سابق چیئرمین پاکستان اٹامک انرجی کمیشن پرویز بٹ انتقال کر گئے

پاکستان ایٹمی توانائی کمیشن (PAEC) کے سابق چیئرمین اور معروف سائنس دان پرویز بٹ 84 برس کی عمر میں انتقال کرگئے۔

 پرویز بٹ پاکستان کی سائنس، ٹیکنالوجی اور دفاعی صلاحیتوں کو مضبوط بنانے میں اہم کردار ادا کرنے والی شخصیات میں شمار ہوتے تھے۔ ان کی قومی اور سائنسی خدمات کو طویل عرصے تک یاد رکھا جائے گا۔

پرویز بٹ نے مئی 1963 میں پاکستان ایٹمی توانائی کمیشن میں شمولیت اختیار کی اور 43 سال سے زائد عرصے تک ادارے کے لیے خدمات انجام دیں۔ انہوں نے اپنی پیشہ ورانہ زندگی کا بڑا حصہ پاکستان کے سائنس اور ٹیکنالوجی کے شعبے کی ترقی کے لیے وقف کیا۔ نیوکلیئر انجینئرنگ اور دفاعی صلاحیتوں کو مضبوط بنانے میں بھی ان کا اہم کردار رہا۔

پرویز بٹ نے ایٹمی ٹیکنالوجی کے پرامن استعمال کے فروغ کے لیے بھی نمایاں خدمات انجام دیں۔ ان کی کوششوں سے صحت، زراعت، صنعت، تحقیق اور تعلیم سمیت مختلف شعبوں میں نیوکلیئر ٹیکنالوجی کے استعمال کو آگے بڑھانے میں مدد ملی۔

انہیں 2001 میں پاکستان ایٹمی توانائی کمیشن کا چیئرمین مقرر کیا گیا۔ ان کی قیادت میں پاکستان کے سائنس اور ٹیکنالوجی پروگرام کو مزید ترقی دینے کے لیے اہم اقدامات کیے گئے۔ بعد ازاں انہوں نے 2006 سے 2008 تک وفاقی سیکریٹری سائنس و ٹیکنالوجی کے طور پر بھی ذمہ داریاں انجام دیں۔ اس کے علاوہ 2013 تک پلاننگ کمیشن میں بطور ایڈوائزر نیوکلیئر انرجی خدمات سرانجام دیتے رہے۔

پرویز بٹ کی قومی خدمات کے اعتراف میں حکومت پاکستان نے انہیں مختلف اعزازات سے نوازا۔ انہیں 1992 میں ستارۂ امتیاز، 1999 میں ہلالِ امتیاز اور 2015 میں نشانِ امتیاز سے نوازا گیا۔

پرویز بٹ کی قیادت میں پاکستان کے سائنس اور ٹیکنالوجی کے شعبے کو نئی سمت ملی۔ انہوں نے اپنی زندگی کا ایک بڑا حصہ ملک کی سائنسی ترقی اور قومی صلاحیتوں کو مضبوط بنانے کے لیے وقف کیا۔ ان کے انتقال سے پاکستان ایک ممتاز سائنس دان، انجینئر اور قومی خدمت گار سے محروم ہوگیا ہے۔ قومی اور سائنسی میدان میں ان کی خدمات کو ہمیشہ قدر کی نگاہ سے دیکھا جائے گا۔