نادرا نے شناختی کارڈ پر پتا تبدیل کروانے والوں کیلئے اہم ہدایات جاری کردیں

نیشنل ڈیٹا بیس اینڈ رجسٹریشن اتھارٹی (نادرا) نے شناختی کارڈ پر درج عارضی یا مستقل پتا تبدیل کروانے کے خواہشمند شہریوں کے لیے اہم ہدایات جاری کردی ہیں۔

نادرا کی ہدایات کے مطابق اگر کوئی شہری شناختی کارڈ پر اپنا عارضی پتا تبدیل کروانا چاہتا ہے تو اسے نئے پتے کا ثبوت فراہم کرنا ہوگا۔ اس مقصد کے لیے کرایہ نامہ، مکان کی رجسٹری یا الاٹمنٹ لیٹر پیش کیا جاسکتا ہے۔ اس کے علاوہ یوٹیلیٹی بل بھی قابل قبول دستاویز کے طور پر جمع کروایا جاسکتا ہے۔

اتھارٹی کے مطابق عارضی پتے کی تبدیلی کے لیے خون کے رشتہ دار یا شریکِ حیات کا شناختی کارڈ بھی پیش کیا جاسکتا ہے۔ تاہم اس شناختی کارڈ پر وہی پتا درج ہونا ضروری ہے جسے شہری اپنے شناختی کارڈ پر عارضی پتے کے طور پر درج کروانا چاہتا ہے۔

نادرا نے واضح کیا ہے کہ شادی شدہ بہن کے شناختی کارڈ پر درج پتے کو عارضی پتے کی تبدیلی کے لیے استعمال نہیں کیا جاسکتا۔ شہریوں کو درخواست جمع کرواتے وقت اس بات کا خاص خیال رکھنے کی ہدایت کی گئی ہے تاکہ دستاویزات کی جانچ کے دوران کسی قسم کی مشکل پیش نہ آئے۔

دوسری جانب شناختی کارڈ پر مستقل پتا تبدیل کروانے کے لیے بھی مخصوص ثبوت فراہم کرنا ضروری ہوگا۔ مستقل پتے کی تبدیلی کے لیے جائیداد کی دستاویز، یوٹیلیٹی بل یا ڈومیسائل پیش کیا جاسکتا ہے۔ یہ دستاویز شہری، اس کے والدین یا شریکِ حیات کے نام پر ہونی چاہیے۔

نادرا کی جانب سے جاری ہدایات میں شہریوں کو مشورہ دیا گیا ہے کہ شناختی کارڈ پر پتا تبدیل کروانے سے پہلے تمام ضروری دستاویزات مکمل کرلیں۔ اس طرح درخواست کے عمل کو آسان بنایا جاسکتا ہے اور غیر ضروری تاخیر سے بھی بچا جاسکتا ہے۔

شہری شناختی کارڈ پر عارضی یا مستقل پتے کی تبدیلی کے لیے اپنے قریبی نادرا دفتر کا رخ کرسکتے ہیں۔ اس کے علاوہ گھر بیٹھے پاک آئی ڈی موبائل ایپ کے ذریعے بھی درخواست جمع کروانے کی سہولت موجود ہے۔