بی وائی ڈی نے پاکستان میں مقامی طور پر اسمبل ہونے والی SEALION 6 متعارف کرا دی

لاہور میں جاری آٹو شو کے دوران چینی کمپنی بی وائی ڈی نے پاکستان میں اپنی نئی گاڑیوں کے ماڈلز پیش کرتے ہوئے SEALION 6 بھی متعارف کرا دی ہے، جسے کمپنی کے مطابق ملک میں مقامی طور پر اسمبل کیا جائے گا۔

ایکسپو سینٹر لاہور میں ہونے والی نمائش میں بی وائی ڈی نے الیکٹرک اور پلگ اِن ہائبرڈ گاڑیوں کی نئی لائن اَپ پیش کی۔ اس میں بی وائی ڈی ایٹو ٹو، بی وائی ڈی شارک 6 اینیورسری ایڈیشن، SEALION 6 اور ڈینزا بی ایٹ شامل ہیں۔

کمپنی کے مطابق SEALION 6 پاکستان میں بی وائی ڈی کی پہلی مقامی طور پر اسمبل ہونے والی گاڑی ہوگی۔ مقامی سطح پر اس کی اسمبلنگ رواں سال کی چوتھی سہ ماہی میں شروع ہونے کی توقع ہے۔

بی وائی ڈی کے مطابق SEALION 6 میں سپر ڈی ایم آئی ٹیکنالوجی استعمال کی گئی ہے، جبکہ گاڑی کی مجموعی ڈرائیونگ رینج 1100 کلومیٹر تک بتائی گئی ہے۔

کمپنی کا کہنا ہے کہ پاکستان میں مقامی اسمبلنگ کے آغاز کے ساتھ SEALION 6 ملک کی آٹو موبائل مارکیٹ میں بی وائی ڈی کی موجودگی کو مزید وسعت دے گی۔