فنگر پرنٹس مدھم یا غائب ہونے پر پریشانی ختم، نادرا نے متبادل ٹیکنالوجی متعارف کرا دی

اسلام آباد: فنگر پرنٹس مدھم ہونے یا بائیومیٹرک مشین سے شناخت نہ ہونے کی وجہ سے مشکلات کا سامنا کرنے والے شہریوں کے لیے نادرا نے متبادل طریقہ کار متعارف کرا دیا ہے۔

نادرا کے ترجمان کے مطابق ایسے شہریوں کی شکایات موصول ہوتی رہی ہیں جن کے انگلیوں کے نشانات بائیومیٹرک ڈیوائس پر درست طور پر شناخت نہیں ہو پاتے۔ اس مسئلے کے حل کے لیے فیشل ریکگنیشن ٹیکنالوجی کو متبادل شناختی طریقے کے طور پر استعمال کیا جارہا ہے۔

نادرا کے مطابق جن افراد کے فنگر پرنٹس موجود نہیں یا کسی وجہ سے مشین انہیں شناخت نہیں کر پاتی، وہ فیشل ریکگنیشن کے ذریعے اپنی شناخت مکمل کرنے کے عمل میں آگے بڑھ سکتے ہیں۔ نادرا کی اپنی معلومات کے مطابق اس کے بائیومیٹرک ویری فکیشن نظام میں فیشل ریکگنیشن اور آئی رس کو بھی شامل کیا گیا ہے۔

اس سہولت کا مقصد ایسے شہریوں کے لیے شناخت کی تصدیق کا متبادل راستہ فراہم کرنا ہے جنہیں انگلیوں کے نشانات سے متعلق مشکلات کا سامنا رہتا ہے۔ اس طرح فنگر پرنٹس کی شناخت میں ناکامی کی صورت میں شہریوں کے لیے شناختی عمل مکمل کرنے کا ایک اضافی آپشن موجود ہوگا۔

فنگر پرنٹس کی شناخت میں مسئلہ صرف شناختی دستاویزات کے حصول تک محدود نہیں رہتا بلکہ مختلف اداروں میں بائیومیٹرک تصدیق کے دوران بھی شہریوں کو مشکلات پیش آسکتی ہیں۔

خاص طور پر بینکوں میں اکاؤنٹ سے متعلق مختلف معاملات، تصدیق اور دیگر بائیومیٹرک مراحل کے دوران ایسے افراد کو پریشانی کا سامنا کرنا پڑ سکتا ہے جن کے فنگر پرنٹس واضح نہ ہوں یا بائیومیٹرک مشین انہیں درست طور پر پڑھنے میں ناکام رہے۔

اسی طرح ٹیلی کام اور دیگر شعبوں میں استعمال ہونے والی بعض بائیومیٹرک ڈیوائسز کے ذریعے شناخت نہ ہونے کی صورت میں بھی صارفین کو اضافی دشواری پیش آ سکتی ہے۔

فیشل ریکگنیشن کی سہولت ایسے شہریوں کے لیے اسی مسئلے کا متبادل حل فراہم کرتی ہے۔ اس طریقہ کار میں شناخت کے لیے چہرے کی شناخت کی ٹیکنالوجی استعمال کی جاتی ہے، جس سے فنگر پرنٹس کی عدم دستیابی یا شناخت میں ناکامی کے باعث پیدا ہونے والی رکاوٹ کو کم کیا جاسکتا ہے۔

نادرا کی جانب سے بائیومیٹرک تصدیق کے نظام میں متبادل ٹیکنالوجیز کا استعمال اس لیے بھی اہم ہے کہ ہر شہری کے فنگر پرنٹس ایک ہی معیار کے نہیں ہوتے اور بعض افراد کو عمر، کام کی نوعیت یا دیگر وجوہات کی بنا پر فنگر پرنٹ اسکیننگ میں مشکلات کا سامنا ہوسکتا ہے۔