پاکستان میں سونے کی قیمت میں بڑی کمی، فی تولہ 12 ہزار 800 روپے سستا

کراچی: پاکستان میں سونے کی قیمت میں ایک ہی دن کے دوران بڑی کمی ریکارڈ کی گئی ہے، جس کے بعد فی تولہ سونے کی قیمت 4 لاکھ 38 ہزار 136 روپے پر آگئی۔

آل پاکستان جیمز اینڈ جیولرز صرافہ ایسوسی ایشن (APGJSA) کے جاری کردہ نرخوں کے مطابق مقامی مارکیٹ میں فی تولہ سونا 12 ہزار 800 روپے کمی کے بعد 438,136 روپے کا ہوگیا۔

اسی طرح 10 گرام سونے کی قیمت میں بھی نمایاں کمی ہوئی اور یہ 10 ہزار 973 روپے نیچے آنے کے بعد 375,631 روپے میں فروخت ہوا۔

سونے کی مقامی قیمت میں یہ کمی عالمی مارکیٹ میں قیمتی دھات کے نرخ کم ہونے کے بعد سامنے آئی ہے۔ بین الاقوامی مارکیٹ میں سونے کی قیمت 128 ڈالر کم ہوکر 4,156 ڈالر فی اونس ہوگئی۔

مقامی صرافہ مارکیٹ میں سونے کی قیمت میں کمی کا سلسلہ اس سے قبل بھی دیکھا گیا تھا۔ ہفتے کے روز فی تولہ سونا 2,100 روپے کمی کے بعد 450,936 روپے پر بند ہوا تھا۔

سونے کے ساتھ ساتھ چاندی کی قیمت میں بھی کمی ریکارڈ کی گئی۔ مقامی مارکیٹ میں چاندی 325 روپے فی تولہ سستی ہوکر 6,578 روپے کی سطح پر آگئی۔

سونے کی قیمتوں میں حالیہ کمی سے مقامی مارکیٹ میں فی تولہ اور 10 گرام سونے کے نرخ میں نمایاں فرق پیدا ہوا ہے، جبکہ عالمی مارکیٹ میں قیمتوں کی نقل و حرکت کا اثر پاکستانی صرافہ بازار پر بھی پڑا ہے۔