آزاد کشمیر میں بے چینی سے کشمیری کاز اور پاکستان کی ساکھ کو نقصان پہنچ رہا ہے، بلاول بھٹو

بلاول بھٹو زرداری نے آزاد کشمیر کی موجودہ صورتحال پر تشویش کا اظہار کرتے ہوئے مظاہرین سے احتجاج ختم کرنے اور قانون کا راستہ اختیار کرنے کی اپیل کی ہے۔

پاکستان پیپلز پارٹی کے چیئرمین بلاول بھٹو زرداری نے جاری بیان میں کہا ہے کہ اسلام آباد معاہدے پر دستخط کا قریب آ جانا ایک انتہائی تاریخی لمحہ ہے، اور یہ کامیابی ایسے وقت میں ہو رہی ہے، جب پوری عالمی برادری کی توجہ مضبوطی کے ساتھ پاکستان پر مرکوز ہے۔

انہوں نے واضح کیا کہ آزاد کشمیر میں جاری حالیہ بے چینی اور کشیدگی خود کشمیری کاز اور پاکستان کی عالمی ساکھ کو شدید نقصان پہنچا رہی ہے، جس کا فوری تدارک ضروری ہے۔

یہ بھی پڑھیں : کالعدم جوائنٹ ایکشن کمیٹی کے احتجاج اور ہڑتال پر آزاد کشمیر کے عوام کا شدید ردعمل

بلاول بھٹو زرداری نے خبردار کیا کہ آزاد کشمیر کی یہ موجودہ نازک صورتحال بھارت اور اسرائیل کے گٹھ جوڑ کو پاکستان کے خلاف فائدہ اٹھانے کے غیر ضروری مواقع فراہم کر رہی ہے۔

انہوں نے تمام مظاہرین سے پرزور اپیل کی ہے کہ وہ اپنے احتجاج کو فوری طور پر پرامن طریقے سے ختم کریں۔

چیئرمین پیپلز پارٹی کا کہنا تھا کہ جن افراد نے بھی احتجاج کے دوران قانون کو اپنے ہاتھ میں لیا ہے، وہ قانون کا احترام کرتے ہوئے خود کو مقامی حکام کے حوالے کر دیں اور قانونی عمل کو اپنا راستہ اختیار کرنے دیں تاکہ علاقے میں امن و امان قائم ہو سکے۔