امریکہ اور ایران کے صدور نے اسلام آباد مفاہمتی یادداشت’ پر الیکٹرانک دستخط کردیئے، وزیر اعظم

وزیر اعظم نے اعلان کیا ہے کہ پاکستان کی ثالثی میں امریکہ اور ایران کے درمیان تاریخی اسلام آباد معاہدہ طے پا گیا ہے، جس کے تحت فوری طور پر فوجی آپریشنز بند اور بحری راستے کھول دیے جائیں گے۔

وزیراعظم شہباز شریف نے سوشل میڈیا پر ایک تاریخی اعلان کرتے ہوئے بتایا ہے کہ امریکہ اور ایران کے درمیان اسلام آباد مفاہمتی یادداشت پر الیکٹرانک طریقے سے دستخط ہو گئے ہیں۔

انہوں نے کہا کہ اس تاریخی معاہدے کی دونوں ملکوں کے صدور نے توثیق کی ہے جبکہ پاکستان نے اس میں ثالث کا کردار ادا کیا ہے۔ یہ معاہدہ دونوں ملکوں کے اعلیٰ ترین سطح پر سفارتی حل کی کوششوں کا نتیجہ ہے۔

ان کا کہنا تھا کہ معاہدے کے تحت فوری طور پر عملدرآمد شروع ہوگا، جس میں پہلے مرحلے کے طور پر ایران فوری طور پر آبنائے ہرمز کو کھولے گا اور امریکہ اپنی بحری ناکہ بندی ختم کر دے گا۔

یہ بھی پڑھیں : پاکستان 30 ایرانی شہریوں کی وطن واپسی کیلئے سہولیات فراہم کر رہا ہے، اسحاق ڈار

وزیراعظم نے امریکی صدر ڈونلڈ ٹرمپ کی امن پسندی اور سفارت کاری کی تعریف کی اور کہا کہ  ان کی کوششوں سے خطہ ایک بڑی تباہی سے بچ گیا۔

انہوں نے امریکی مذاکراتی ٹیم کے ارکان جے ڈی وینس، اسٹیو وٹکوف اور جیرڈ کشنر کی محنت کو بھی سراہا۔ دوسری جانب شہباز شریف نے ایرانی سپریم لیڈر آیت اللہ سید مجتبیٰ حسینی خامنہ ای اور صدر مسعود پزیشکیان کی حکمت اور بصیرت کو خراج تحسین پیش کیا۔

انہوں نے ایرانی مذاکراتی ٹیم کے ارکان محمد باقر قالیباف، عباس عراقچی اور اسکندر مومنی کی پائیداری کی بھی تعریف کی۔ وزیراعظم نے اس پورے عمل میں قطر، سعودی عرب، ترکی اور مصر کی قیادت کے تعاون کو بھی سراہا۔

انہوں نے خاص طور پر پاکستانی فوج کے سربراہ فیلڈ مارشل سید عاصم منیر کی انتھک کوششوں اور مخلصانہ لگن کا ذکر کیا، جو اس بڑی کامیابی اور علاقائی استحکام کا سبب بنی۔ وزیر اعظم نے امید ظاہر کی کہ یہ معاہدہ پورے خطے میں امن اور خوشحالی کی بنیاد بنے گا۔