نیوزی لینڈ نے ہنرمند غیر ملکیوں کو خوشخبری سنادی

نیوزی لینڈ نے بیرون ملک ہنرمند افراد کے لیے مستقل رہائش حاصل کرنے کا ایک نیا اور آسان راستہ متعارف کروایا ہے۔

 اس نئے پروگرام کو “اسکلڈ مائیگرنٹ ریزیڈنٹ ویزا” کہا جا رہا ہے، جس کے تحت دنیا بھر کے اہل افراد کو ملک میں کام کرنے اور رہائش اختیار کرنے کا موقع دیا جا رہا ہے۔

امیگریشن حکام کے مطابق یہ ویزا خاص طور پر ایسے افراد کے لیے ہے جو پیشہ ورانہ مہارت رکھتے ہیں اور نیوزی لینڈ میں مستقل طور پر رہنا چاہتے ہیں۔ اس اسکیم کے ذریعے نہ صرف ملازمت بلکہ تعلیم اور خاندانی سہولتیں بھی حاصل کی جا سکتی ہیں۔

اس ویزا کے ذریعے کامیاب درخواست گزار غیر معینہ مدت تک نیوزی لینڈ میں رہ سکتے ہیں۔ وہ اپنے شریکِ حیات اور 24 سال تک کے زیر کفالت بچوں کو بھی ساتھ لے جا سکتے ہیں۔ دو سال تک اس ویزا پر رہنے کے بعد مستقل رہائش کے لیے درخواست دینے کا موقع بھی ملتا ہے۔

ابتدائی درخواست فیس تقریباً 6450 نیوزی لینڈ ڈالر مقرر کی گئی ہے۔ اس ویزا کے لیے امیدوار کا عمر میں 55 سال یا اس سے کم ہونا ضروری ہے۔ اس کے علاوہ صحت مند ہونا، اچھا کردار اور انگریزی زبان پر عبور بھی لازمی شرائط میں شامل ہیں۔

درخواست دہندہ کے پاس کسی تسلیم شدہ ادارے یا آجر سے کل وقتی ہنرمند ملازمت کی پیشکش ہونا ضروری ہے۔ ملازمت کم از کم 30 گھنٹے ہفتہ وار ہونی چاہیے۔ اس کے ساتھ ساتھ کم از کم 6 اسکلڈ پوائنٹس حاصل کرنا بھی شرط ہے۔

تنخواہ کے حوالے سے بھی واضح معیار مقرر کیا گیا ہے۔ لیول 1 سے 3 کی ملازمتوں کے لیے کم از کم 35 نیوزی لینڈ ڈالر فی گھنٹہ جبکہ لیول 4 سے 5 کے لیے 52.50 ڈالر فی گھنٹہ مقرر ہیں۔ اضافی پوائنٹس تعلیمی قابلیت، پیشہ ورانہ رجسٹریشن اور آمدنی کی بنیاد پر دیے جاتے ہیں۔ نیوزی لینڈ میں کام کرنے کے تجربے پر مزید 3 پوائنٹس بھی حاصل کیے جا سکتے ہیں۔

انگریزی زبان کی شرط نہ صرف درخواست دہندہ بلکہ اس کے شریکِ حیات اور 16 سال سے زائد عمر کے بچوں پر بھی لاگو ہوتی ہے۔ اگر یہ شرط پوری نہ ہو تو انہیں زبان سیکھنے کے اخراجات خود برداشت کرنا ہوں گے۔

درخواست دینے کے عمل میں پہلے “Expression of Interest” جمع کرانا ہوتا ہے۔ اس کے بعد اہل امیدواروں کو “Invitation to Apply” جاری کیا جاتا ہے۔ پھر ضروری دستاویزات جیسے پاسپورٹ، میڈیکل اور پولیس کلیئرنس جمع کرانا ہوتی ہیں۔ مکمل درخواست چار ماہ کے اندر جمع کروانا لازم ہے۔