جاپانی فوج کا فوجی ہیلی کاپٹر گر کر تباہ، عملے کے 10 ارکان ہلاک

ایک لاپتہ جاپانی فوج کا ہیلی کاپٹر جس میں عملے کے 10 ارکان سوار تھے، جنوبی جزیرے کے قریب سمندر میں گر کر تباہ ہو گیا۔

گراؤنڈ سیلف ڈیفنس فورس کے سربراہ یاسونوری موریشتا نے پریس کانفرنس میں بتایا کہ میاکو جزیرے کے شمال میں ایک جاسوسی مشن پر جانے والے ایک بلیک ہاک ہیلی کاپٹر ریڈار سے غائب ہو گیا۔

انہوں نے کہا کہ طیارہ کے پرزہ جات کا ملبہ ٹوکیو سے تقریباً ایک ہزار 800  کلومیٹر جنوب مغرب میں اس علاقے میں دیکھا گیا۔

یہ بھی پڑھیں : ہم جنس پرستوں کی شادی پر پابندی امتیازی سلوک نہیں : جاپانی وزیر اعظم کے تبصرے پر تنازع

ان کا کہنا تھا کہ ہیلی کاپٹر کیوشو کے جنوبی مرکزی جزیرے پر کماموٹو پریفیکچر میں ایک اہم علاقائی فوجی اڈے پر تعینات تھا، اور اس کے عملے کے 10 ارکان میں سے ایک ڈویژن کمانڈر یوچی ساکاموتو ہے۔

ٹی وی رپورٹ کے مطابق ہیلی کاپٹر میاکو جزیرے سے روانہ ہونے کے تقریباً ایک گھنٹہ بعد اور اپنی مقررہ واپسی سے تقریباً آدھا گھنٹہ قبل ریڈار سے غائب ہو گیا تھا۔

جاپانی کوسٹ گارڈ کے جہازوں کو بھی تیل کے ایسے آثار ملے ہیں، جو لاپتہ ہیلی کاپٹر سے متعلق ہو سکتے ہیں، لیکن حکام نے اس رپورٹ کی تصدیق کرنے سے انکار کر دیا۔

تائیوان سمیت خطے میں چین کی بڑھتی ہوئی عسکری سرگرمیوں کے جواب میں حکومت جنوب مغربی جاپان میں جارحانہ طور پر اپنی دفاعی صلاحیت کو بڑھا رہی ہے۔