جان بوجھ کر موٹا ہونے پر شہری کو قید کی سزا

جنوبی کوریا کے ایک شہری کو جان بوجھ کر خود کو فوجی خدمات سے نا اہل قرار دینے اور موٹاپے کے الزام میں سزا ہو گئی۔

غیر ملکی میڈیا کے مطابق حال ہی میں جنوبی کوریا کے 26 سالہ شخص کو موٹاپے کا شکار ہونے اور خود کو فوجی خدمات کیلئے نااہل قرار دینے اور جان بوجھ کر زیادہ کھانا کھانے کے جرم میں ایک سال قید کی سزا سنائی گئی ہے۔

جنوبی کوریا کے ایک نوجوان نے مبینہ طور پر زیادہ کھانے اور موٹاپے کا شکار ہو کر فوج میں خدمات انجام دینے سے بچنے کی کوشش کی۔ بدقسمتی سے یہ ان کی منصوبہ بندی کے مطابق کام نہیں کر سکا اور اب انہیں ایک سال سلاخوں کے پیچھے گزارنا پڑ رہا ہے۔

مزید پڑھیں:جاسوسی کے الزام میں صحافی کو 7 سال قید کی سزا

جنوبی کوریا میں فوجی خدمات کوئی معمولی بات نہیں ہے، اس سے کوئی فرق نہیں پڑتا کہ آپ عالمی سطح پر معروف گلوکار، ایک کامیاب اداکار، یا ارب پتی ہیں۔

اگر آپ جنوبی کوریا کے اندر 18 اور 35 سال کی عمر کے درمیان ایک صحت مند بالغ مرد ہیں تو آپ کو کم از کم 21 ماہ فوج میں گزارنے ہوں گے۔ تاہم اگر آپ کو صحت کے مسائل کی وجہ سے خدمت کے لئے نااہل قرار دیا جاتا ہے تو آپ فوجی خدمات سے بچ سکتے ہیں۔