ہزاروں کراچی والوں کو کتوں نے کاٹ لیا، انکشاف

کراچی میں کتوں کے کاٹنے کے کیسز میں خطرناک حد تک اضافہ ہوا ہے اور رواں سال صرف دو ماہ میں 10 ہزار سے زائد کیسز رپورٹ ہوئے ہیں۔

ریبیز کلینک کی انچارج ڈاکٹر رومانہ فرحت نے بتایا کہ سال کے پہلے دو ماہ (جنوری اور فروری) کے دوران کراچی کے سول اسپتال میں کتوں کے کاٹنے کے کم از کم 5 ہزار 795 کیسز رپورٹ ہوئے۔

یہ تعداد گزشتہ سال کے اسی عرصے کے دوران رپورٹ ہونے والے 3،269 کیسز کے مقابلے میں کافی زیادہ ہے۔ ڈاکٹر فرحت نے مزید کہا کہ سول اسپتال میں روزانہ تقریبا 100 کیسز لائے جا رہے ہیں۔

ڈاکٹر فرحت نے بتایا کہ کتے کے کاٹنے کے علاوہ بلی کے کاٹنے والے 13 مریضوں کو بھی سول اسپتال لایا گیا تھا۔

طبی ماہرین نے خبردار کیا ہے کہ ریبیز صرف کتے کے کاٹنے تک محدود نہیں ہے بلکہ بلیاں، گدھے اور بندر بھی وائرس منتقل کرسکتے ہیں۔

انہوں نے انفیکشن کے پھیلاؤ کو روکنے کے لئے ان جانوروں کے کاٹنے کے بعد اینٹی ریبیز ویکسینیشن کی اہم ضرورت پر زور دیا۔

شہر میں کتوں کی بڑھتی ہوئی آبادی پر تشویش کے حوالے سے سندھ حکومت نے 2021 میں ریبیز کنٹرول پروگرام سندھ (آر سی پی ایس) کا آغاز کیا تھا۔

اس پروگرام کا مقصد بڑے پیمانے پر کتوں کی ویکسینیشن اور نس بندی کی کوششوں کے ساتھ ساتھ کمیونٹی کی تعلیم کے ذریعے ریبیز کی وجہ سے ہونے والی انسانی اموات کو ختم کرنا تھا۔

بدقسمتی سے یہ منصوبہ حکومت کے جوش و جذبے اور عزم کے فقدان کی وجہ سے ناکام ہوا اور شہری اب بھی اس کا خمیازہ بھگت رہے ہیں۔