بڑی خوشخبری؛ بینظیر انکم سپورٹ پروگرام میں ڈیجیٹل موبائل والٹ اکاؤنٹ کھلنا شروع، آسان طریقہ جانیے

بینظیر انکم سپورٹ پروگرام (BISP 8171) نے 2025 میں اپنے مستحقین کے لیے ڈیجیٹل والٹ سسٹم متعارف کروا دیا۔

بینظیر انکم سپورٹ پروگرام (BISP 8171) نے سال 2025 میں اپنے مستحقین کے لیے ایک اور بڑا قدم اٹھاتے ہوئے ڈیجیٹل والٹ سسٹم متعارف کرا دیا ہے، جس کا مقصد مالی امداد کی ترسیل کو آسان، محفوظ اور شفاف بنانا ہے۔

 اس نئے نظام کے تحت اہل خواتین کو ستمبر 2025 سے 13,500 روپے کی سہ ماہی قسط براہِ راست ان کے موبائل بٹوے یا منسلک بینک اکاؤنٹس میں منتقل کی جائے گی، جس سے لمبی قطاروں اور غیر ضروری کٹوتیوں سے نجات ملے گی۔

حکام کے مطابق BISP 8171 ڈیجیٹل والٹ ایک سادہ موبائل بیسڈ اکاؤنٹ سروس ہے، جسے مستحق خاندانوں کو ادائیگیوں کی بروقت اور شفاف فراہمی یقینی بنانے کے لیے متعارف کیا گیا ہے۔ فائدہ اٹھانے والی خواتین اپنے ڈیجیٹل والٹ کے ذریعے فوری طور پر BISP قسط وصول کر سکتی ہیں، اے ٹی ایم، بینک یا مجاز ایجنٹس سے رقم نکلوا سکتی ہیں، اور 8171 ایس ایم ایس سروس یا موبائل ایپ کے ذریعے کسی بھی وقت اپنا بیلنس چیک کر سکتی ہیں۔

اس نظام کا سب سے اہم پہلو یہ ہے کہ اب مستحقین کو کسی ایجنٹ یا بچولیا کی ضرورت نہیں رہے گی، اور انہیں پوری رقم بغیر کسی کٹوتی کے براہِ راست حکومت کی جانب سے فراہم کی جائے گی۔ یہ اقدام حکومت کی اس پالیسی کا حصہ ہے جس کا مقصد سماجی تحفظ کے پروگراموں کو جدید تقاضوں کے مطابق ڈیجیٹل اور شفاف بنانا ہے، تاکہ مالی امداد صحیح وقت پر اور صحیح ہاتھوں تک پہنچ سکے۔