پنجاب راشن کارڈ اسکیم میں کیسے اپلائی کرسکتے ہیں؟ آسان طریقہ سامنے آگیا

وزیر اعلیٰ پنجاب مریم نواز نے صوبے کے کم آمدنی والے گھرانوں کے لیے راشن کارڈ اسکیم کا باقاعدہ آغاز کر دیا ہے۔

 اس اسکیم کے تحت مستحق شہریوں کو ایک جدید ڈیجیٹل اسمارٹ کارڈ فراہم کیا جائے گا، جس کے ذریعے وہ ہر ماہ 3 ہزار روپے کی مالی معاونت حاصل کر سکیں گے۔ یہ رقم صرف مجاز گروسری اور یوٹیلٹی اسٹورز پر بنیادی اشیائے ضروریہ کی خریداری کے لیے استعمال کی جا سکے گی۔

حکومت پنجاب کا یہ اقدام مہنگائی سے متاثرہ طبقات کو ریلیف دینے اور مالی بوجھ کم کرنے کی کوششوں کا حصہ ہے۔ ابتدائی مرحلے میں ڈیڑھ لاکھ خاندانوں کو راشن کارڈ فراہم کیے جائیں گے، جن کے ذریعے انہیں قرض لیے بغیر باعزت طریقے سے خوراک خریدنے کی سہولت میسر آئے گی۔

حکام کے مطابق راشن کارڈ کی فراہمی شفاف اور مؤثر طریقے سے کی جائے گی تاکہ امداد صرف ان خاندانوں تک پہنچے جو واقعی اس کے مستحق ہیں۔ پہلے مرحلے میں یومیہ اجرت پر کام کرنے والے اور صنعتی کارکنان کے خاندانوں کو اس سہولت سے فائدہ اٹھانے کا موقع دیا جائے گا۔

اس اسکیم کے لیے صرف پنجاب کے رہائشی اہل ہوں گے۔ درخواست دہندگان کے لیے ضروری ہے کہ وہ پنجاب سوشل اکنامک رجسٹری (PSER) سروے میں رجسٹرڈ ہوں، ان کے پاس درست شناختی کارڈ اور ایک فعال موبائل نمبر موجود ہو۔ مزید برآں، ان کی ماہانہ گھریلو آمدنی 50 ہزار روپے سے کم اور PMT اسکور 35 سے کم ہونا چاہیے۔ سرکاری ملازمین اور BISP کے موجودہ مستفیدین اس اسکیم کے اہل نہیں ہوں گے۔

فی خاندان صرف ایک فرد درخواست دے سکتا ہے، اور مرد و خواتین دونوں کو اپلائی کرنے کی اجازت ہوگی۔ نان ٹیکس فائلرز اور بے جائیداد افراد بھی اس اسکیم کے لیے اہل ہیں۔

درخواست دینے کے لیے شہری پنجاب سوشل اکنامک رجسٹری کے آن لائن پورٹل پر رجسٹریشن کر سکتے ہیں یا قریبی یونین کونسل آفس یا ای-خدمت مرکز سے بھی رجوع کیا جا سکتا ہے۔