معروف کاروباری شخصیت عارف حبیب کی پی آئی اے کے بعد بلیو اکانومی میں سرمایہ کاری پر نظریں مرکوز

معروف کاروباری شخصیت عارف حبیب نے پی آئی اے کے بعد بلیو اکانومی میں سرمایہ کاری پر توجہ مرکوز کر لی ہے۔

بزنس ریکارڈر کے مطابق عارف حبیب کی پاکستان نیشنل شپنگ کارپوریشن (PNSC) کی انتظامیہ کے ساتھ ایک اہم ملاقات ہوئی، جس میں بلیو اکانومی کے شعبے میں سرمایہ کاری کے امکانات پر تبادلۂ خیال کیا گیا۔

سرمایہ کاری کا بنیادی مقصد پاکستان کے سمندری وسائل کا بہتر استعمال کرتے ہوئے ملکی ترقی میں کردار ادا کرنا ہے۔ پاکستان کے سمندری وسائل زیادہ تر غیر استعمال شدہ ہیں اور مجموعی قومی پیداوار (GDP) میں ان کا حصہ صرف 0.5 فیصد ہے۔

پاکستان نیشنل شپنگ کارپوریشن نے 2030 تک اپنے جہازوں کی تعداد 10 سے بڑھا کر 54 کرنے کا ہدف مقرر کیا ہے، جس کے تحت سالانہ 6 ارب ڈالر کی سرمایہ کاری حاصل کرنے کا منصوبہ ہے۔

عارف حبیب نے پی آئی اے کی بحالی کا روڈ میپ پیش کرتے ہوئے کہا کہ پی آئی اے کے تمام 34 طیارے ستمبر 2026 تک فعال ہوں گے، جبکہ اس وقت صرف 17 طیارے فعال ہیں۔

انہوں نے بتایا کہ 135 ارب روپے کی خریداری قیمت میں سے 125 ارب روپے براہِ راست پی آئی اے میں نئے انجنوں کی خریداری اور توسیع کے لیے لگائے جائیں گے۔

انہوں نے مزید کہا کہ پی آئی اے کی توسیع کے لیے مزید ماہرین کو بھی شامل کیا جائے گا اور تمام بھرتیاں میرٹ پر ہوں گی۔ پی آئی اے کی نجکاری ملک کے وسیع اقتصادی اصلاحاتی ایجنڈے کے لیے ایک اہم سنگِ میل ہے۔

پی آئی اے کی نجکاری کو سرکاری خسارہ کم کرنے اور معیشت میں بہتری کے لیے ایک اہم قدم قرار دیا گیا ہے۔ ماہرین کے مطابق معیشت میں بہتری کے لیے بلیو اکانومی سیکٹر میں اصلاحات اور سرمایہ کاری ناگزیر ہے، جبکہ اس شعبے میں جدت اور بہتر استعمال سے روزگار کے اہم مواقع بھی پیدا ہوں گے۔