بی آئی ایس پی ’بچوں کی نشوونما‘ پروگرام میں رجسٹریشن کیلئے اہلیت اور شرائط جان لیں

بینظیر انکم سپورٹ پروگرام کے تحت خواتین اور بچوں کے لیے نشوونما پروگرام کا آغاز کیا گیا ہے۔ یہ پروگرام حاملہ خواتین، دودھ پلانے والی ماؤں اور دو سال سے کم عمر بچوں کو مالی معاونت اور غذائی سہولیات فراہم کرتا ہے۔

اس پروگرام سے استفادہ حاصل کرنے کے لیے خواتین کا پہلے بی آئی ایس پی میں رجسٹر ہونا ضروری ہے۔ پروگرام میں صرف حاملہ خواتین، دودھ پلانے والی مائیں اور پیدائش کے بعد 23 ماہ تک کے بچے شامل ہو سکتے ہیں۔

رجسٹریشن کے لیے خواتین اپنے تحصیل یا ڈسٹرکٹ ہیڈ کوارٹرز اسپتال میں قائم نشوونما مراکز سے رابطہ کر سکتی ہیں۔ ضروری دستاویزات میں نادرا کا شناختی کارڈ، بچے کا ب فارم اور حفاظتی ٹیکوں کا کارڈ شامل ہیں۔

مالی معاونت کے حوالے سے حاملہ خواتین کو ہر تین ماہ بعد 2500 روپے دیے جائیں گے۔ بچے کی پیدائش پر بیٹے کے لیے 2500 روپے اور بیٹی کے لیے 3000 روپے دیے جائیں گے، جس میں 500 روپے سفری اخراجات شامل ہیں۔ یہ مالی مدد بچے کی عمر دو سال ہونے تک جاری رہے گی۔

اس کے علاوہ پروگرام میں شامل خواتین اور بچوں کو غذائیت سے بھرپور خوراک بھی فراہم کی جائے گی تاکہ صحت مند نشوونما ممکن ہو سکے۔ یہ مالی اور غذائی معاونت بینظیر انکم سپورٹ پروگرام کی عام مالی امداد سے علیحدہ فراہم کی جا رہی ہے۔