موثر بارڈر مینجمنٹ نے پولیو، دہشتگردی اور اسمگلنگ کا گھیرا تنگ کر دیا

حکومتِ پاکستان کی جانب سے افغانستان کے ساتھ غیر منظم سرحدی نقل و حرکت روکنے اور مؤثر بارڈر مینجمنٹ نافذ کرنے کے مثبت نتائج سامنے آنا شروع ہو گئے ہیں۔ حکام کے مطابق 2025 میں کیے گئے یہ اقدامات نہ صرف انسدادِ پولیو بلکہ قومی سلامتی اور معاشی استحکام کے لیے بھی ایک اہم سنگِ میل ثابت ہوئے ہیں۔

سرکاری اعداد و شمار کے مطابق سال 2025 کے دوران پاکستان میں پولیو کے مجموعی طور پر صرف 30 کیسز رپورٹ ہوئے، جو 2024 کے مقابلے میں 59.5 فیصد کمی ظاہر کرتے ہیں۔ حکام کا کہنا ہے کہ یہ کمی صرف صحت کے شعبے کی کامیابی نہیں بلکہ اس بات کا ثبوت ہے کہ بارڈر مینجمنٹ پالیسی کے باعث سرحد پار سے آنے والے خطرات کو مؤثر طور پر محدود کیا گیا ہے۔

حکام کے مطابق غیر قانونی طور پر مقیم لاکھوں افغان شہریوں کی واپسی سے سرحدی علاقوں میں پولیو وائرس کے پھیلاؤ میں نمایاں کمی آئی ہے۔ پاک-افغان سرحد پر سخت نگرانی، قانونی آمدورفت کے نظام اور اضافی سیکیورٹی چیک پوائنٹس نے نہ صرف بیماری بلکہ دہشتگردی اور اسمگلنگ کے راستوں کو بھی محدود کیا ہے۔

اعداد و شمار کے مطابق 2025 میں خیبر پختونخوا پولیو سے سب سے زیادہ متاثرہ صوبہ رہا جہاں 19 کیسز رپورٹ ہوئے، تاہم افغان شہریوں کی واپسی اور بہتر سیکیورٹی کنٹرول کے باعث ویکسینیشن مہمات پہلے کے مقابلے میں زیادہ محفوظ اور مؤثر ثابت ہوئیں۔

حکام کا کہنا ہے کہ 2025 کے دوران پولیو ویکسینیشن ٹیموں پر فتنہ الخوارج اور فتنہ الہندوستان کی جانب سے صرف 18 حملے رپورٹ ہوئے، جو گزشتہ سال کے مقابلے میں کم ہیں۔ اسی دوران سیکیورٹی فورسز نے طورخم سرحدی گزرگاہ سے گولا بارود کے 21 ہزار راؤنڈ بھی ضبط کیے، جسے سخت سرحدی کنٹرول کا براہِ راست نتیجہ قرار دیا جا رہا ہے۔

حکام کے مطابق مؤثر بارڈر مینجمنٹ کے معاشی اثرات بھی سامنے آ رہے ہیں۔ غیر قانونی نقل و حرکت میں کمی، اسمگلنگ نیٹ ورکس پر قابو اور محفوظ سرحدی ماحول کے باعث قانونی تجارت اور سرمایہ کاری کے اعتماد میں اضافہ ہوا ہے۔ حکام کا کہنا ہے کہ 2026 میں مربوط ویکسینیشن، بہتر سیکیورٹی اور سخت نگرانی کے ذریعے نہ صرف پولیو بلکہ دہشتگردی کے خاتمے کی جانب پیش رفت جاری رہے گی۔